របៀបរកស៊ីសំរាប់អ្នកដែលមានដើមទុនទាបជាង $500

លោកអ្នកប្រហែលជាឆ្ងល់ថា លុយទាបជាង$500 រកស៊ីម៉េចកើត? ហើយរកស៊ីមុខរបរអ្វីទៅ?  ជាការពិតណាស់ ការរកស៊ីគឺមិនងាយស្រួលទេ ទាល់តែយើងមានផ្នត់គំនិតជាអ្នករកស៊ីទើបអាចទទួលបានជោគជ័យ។ ខាងក្រោមនេះ គឺជាគំនិតយោបល់ ដើម្បីអោយបងប្អូនយកទៅពីចារណា បើតាមបទពិសោធន៌ យោបល់នេះភាគច្រើនទទួលបានជោគជ័យ ៨០​ ទៅ ៩០​ភាគរយ។  ១. រកនឹកអាជីវកម្មណាដែលអាចអោយអ្នកប្រើចំណេះដឹង ជំនាញ និងបទពិសោធន៍ដែលអ្នកទទួលបានពីសាលា និងបានពីការធ្វើការអោយគេ ឧទាហរណ៍ថា ប្រសិនបើធ្លាប់ធ្វើជាភ្នាក់ងារទិញលក់ដីធ្លី ឬគម្រោងនានា អ្នកអាចបើកសេវាទាក់ទងនឹងអចលនទ្រព្យដែលអ្នកចេះ។ ប្រសិនបើអ្នកចេះពីការទូរទាត់ពន្ធ និងគណនេយ្យ ឬធ្លាប់ធ្វើការងារក្នុងផ្នែកនេះ អ្នកអាចបើកសេវាកម្មពន្ធដារ និងគណនេយ្យសម្រាប់ម្ចាស់អាជីវកម្មខ្នាតនានា។ ប្រសិនបើអ្នកពូកែគណិតវិទ្យា ឬភាសារបរទេសអ្នកអាចបើកសេវាបង្រៀនដល់ផ្ទះ ឬបើកបង្រៀនគួរគិតម៉ោង។ បើអ្នកពូកែវោហាស័ព្ទ អ្នកអាចទទួលពិធីការក្នុងកម្មវិធីផ្សេងៗ…។ និយាយរួមទៅ មានន័យថាយកអ្វីដែលអ្នកចេះធ្វើជាទុន ជំនួសដោយការប្រើលុយមកធ្វើជាទុន។ ការធ្វើទីផ្សារគួរតែចាប់ផ្តើមស្វែងរកការគាំទ្រពីគ្រួសារ មិត្តភក្តិ សាច់ញាតិ ហើយនៅពេលវាចាប់ផ្តើមបង្កើតចំណូលហើយ វានឹងក្លាយជាបទពិសោធន៍ដំបូងដ៏អស្ចារ្យរបស់អ្នកក្នុងនាមជាសហគ្រិនម្នាក់។ ២. បន្ថែមប្រភពចំណូលមួយ ឬច្រើនជាងនេះបន្ថែមទៀត អ្នកអាចបង្កើតប្រភពចំណូលបន្ថែមពីលើចំណូលដែលអ្នករកបាន ឧទាហរណ៍ថា​ កាលពីមុនអ្នកជាភ្នាក់ងារទិញលក់ដី ហើយពេលអ្នកនេះអាចបង្កើនចំណូលដោយបន្ថែមសេវាវាយតម្លៃអចលនទ្រព្យ សេវាប្រឹក្សាយោបល់…។ ព្យាយាមប្រើអ្វីដែលអ្នកខំចំណាយពេលរៀន ដើម្បីទាញប្រយោជន៍មកវិញអោយអស់លទ្ធភាពរបស់វា។ ៣. វិនិយោគឡើងវិញ ប្រើលុយដែលអ្នករកបាន ដើម្បីពង្រីកអាជីវកម្មឲ្យកាន់តែធំ និងកាន់តែមានស្តង់ដារជាងមុន។ ទិញទំនិញបន្ថែម សម្ភារៈបន្ថែម ឬក៏ចំណាយលើការធ្វើទីផ្សារបន្ថែម។ រាល់ពេលមានប្រតិបត្តិការលក់ ចំណូលនៃអាជីវកម្មរបស់អ្នកនឹងកាន់តែច្រើនទៅៗ ហើយនេះគឺជាវិធីមួយល្អបំផុតដែលមិនចាំបាច់ពិបាកចិត្តនឹងការខ្ចីលុយរបស់អ្នកដទៃ។ អ្វីដែលអ្នកត្រូវចាំ៖ ពេលចេញរកស៊ីដំបូង ទោះបីជោគជ័យ ឬបរាជ័យ វាគឺជាមេរៀនមួយដ៏អស្ចារ្យសម្រាប់អ្នក។ នៅពេលសម្រេចចិត្តថាបើក អ្នកក៏ត្រូវគិតថាវាអាចបិទដោយរបៀបណាដែរ ហើយមូលហេតុដែលអ្នកមិនត្រូវខូចចិត្តនោះគឺអាជីវកម្មនេះមិនបានប្រើទុនច្រើននោះទេ វាមានហានិភ័យទាប៕