សាធារណៈមតិអន្តរជាតិ

ថ្មីៗនេះ ខ្ញុំកត់សម្គាល់ឃើញថា បងប្អូនកូនខ្មែរយើងមួយចំនួន បានបង្ហោះសារជាច្រើនពាក់ព័ន្ធនឹងជនបរទេសដែលធ្វើការក្នុងស្ថាប័នព័ត៌មានអន្តរជាតិធំៗ ដែលសរសេរព័ត៌មានអំពីខ្មែរ ដែលមិនឆ្លុះបញ្ចាំងពីតថភាពនៅប្រទេសខ្មែរយើង។ មែនទែនទៅ ការបង្ហោះសារផ្ទាល់ខ្លួនលើហ្វេសប៊ុកគឺជាការសម្តែងមតិហើយ តែបានត្រឹមតែដឹងតែខ្លួនឯង និងគ្នាឯង។ តើមានបរទេសឯណាគេទៅដឹងសាររបស់យើង? គេចាប់អារម្មណ៍នឹងសាររបស់យើង? 

ដូច្នេះ មានតែបងប្អូនកូនខ្មែរយើងខិតខំប្រឹងប្រែងឱ្យខ្លាំង ឱ្យមានកម្លាំងពិតរបស់យើងអាចទៅធ្វើការនៅក្នុងស្ថាប័នព័ត៌មានអន្តរជាតិធំៗទាំងនោះទេ ទើបយើងអាចមានលទ្ធភាពបង្ហាញសំឡេងរបស់យើង ដើម្បីផ្តល់ព័ត៌មានពិតអំពីកម្ពុជា ដល់សាធារណៈមតិអន្តរជាតិបាន។ 

ប្រទេសមួយចំនួន គេខិតខំណាស់ក្នុងការបណ្តុះបណ្តាលយុវជនរបស់គេឱ្យមានសមត្ថភាពហើយអាចបញ្ជ្រាបខ្លួនទៅក្នុងស្ថាប័នអន្តរជាតិធំៗនានា។ ដូច្នេះ ចង់ឬមិនចង់ គេពិតជាការពារផលប្រយោជន៍ជាតិគេហើយ។ 

ក្នុងន័យនេះ សូមបងប្អូនកូនខ្មែរយើង ដែលមានសមត្ថភាពបានធ្វើការក្នុងស្ថាប័នព័ត៌មានអន្តរជាតិធំៗ សូមជួយសរសេរអត្ថបទដែលមានប្រយោជន៍ដល់ប្រជាជាតិខ្មែរយើងផង សូមកុំសរសេរតែរឿងកកូរកកាយហែកហួរជាតិខ្លួនឯង ព្រោះស្ថាប័នព័ត៌មានអន្តរជាតិធំៗទាំងនោះមានឥទ្ធិពលដល់សាធារណមតិអន្តរជាតិខ្លាំងណាស់។ 

ដូចគ្នាដែរ សូមបងប្អូនកូនខ្មែរយើង ដែលធ្វើការក្នុងស្ថាប័នអន្តរជាតិធំៗ សូមជួយគិតគូរយ៉ាងណាទាញផលប្រយោជន៍មកជួយជាតិយើងផង។

សូមកុំភ្លេចថា ពិភពលោកបច្ចុប្បន្ន ជាពិភពលោកដែលពោរពេញដោយការឡប់ប៊ី អ្នកណាពូកែនិយាយ អ្នកនោះទទួលបានការគាំទ្រ ទទួលបានផលប្រយោជន៍ ទទួលបានការអាណិតអាសូរ។ជួនកាល ចោរក៏អាចក្លាយជាជនរងគ្រោះដ៏គួរឱ្យអាណិតបានដែរ។

ដូច្នេះ សូមបងប្អូនកូនខ្មែរយើងកុំគិតតែឈឺចាប់ ដោយមិនគិតគូរពង្រឹងសមត្ថភាពខ្លួនឯងឱ្យសោះ។ បើមិនខិតខំទាំងអស់គ្នាទេ  នោះយើងទៅមុខមិនរួចទេ។ ពីនេះតទៅ យើងត្រូវតែខិតខំទ្វេរឡើង បើគេដើរ យើងរត់ បើគេរត់ យើងរត់ឱ្យកាន់តែលឿន ទើបយើងអាចទៅមុខទាន់គេ។គេមិនអាចដេកស្ងៀម រងចាំយើងដើរទៅទាន់គេ ហើយចាំបន្តដំណើរទៅទាំងអស់គ្នានោះទេ។ 

សូមខិតខំឡើងបងប្អូនកូនខ្មែរយើង កុំរវល់តែកាច់រាងមុខ Tiktok បង្អួតដបស្រាក្នុងហ្វេសប៊ុកបង្ហោះម៉ូតូ បង្ហាញជីវិតហាយសូ ឬសម្ញែងសម្ភារៈ គឺមិនអាចជួយជាតិបានទេ៕