អួន ច័ន្ទភត្រា ត្រៀមបង្ហាញសមត្ថភាពដំបូងនៅស៊ីហ្គេម

![a.jpg](https://serey.io/imageupload_data/b6aa706949992efc0ef17b0dccf59a0c8d9875b8) ដោយ: សឿន វណ្ណឌេតកីឡាការិនីជម្រើសជាតិទ្រីយ៉ាត្លុង អួន ច័ន្ទភត្រា កំពុងហ្វឹកហាត់បង្កើនសមត្ថភាពយ៉ាងយកចិត្តទុកដាក់ ដើម្បីត្រៀមប្រជែងក្នុងព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះ។ ជាមួយការប្តេជ្ញានឹងប្រឹងប្រែងឲ្យអស់ពីសមត្ថភាព ម្ចាស់មេដាយប្រាក់ក្នុងការប្រកួតជើងឯកពិភពលោក World Police and Fire Games រូបនេះ រំពឹងថា ខ្លួននឹងធ្វើបានល្អ សម្រាប់ការបង្ហាញខ្លួនលើកដំបូងក្នុងព្រឹត្តិការណ៍ស៊ីហ្គេម។ មិនខុសគ្នាឡើយ អ្នកស្រី សូរ៉ាន់ ដេត គ្រូបង្វឹកក្រុមជម្រើសជាតិទ្រីយ៉ាត្លុង ក៏រំពឹងកូនសិស្សខ្លួនធ្វើបានល្អក្នុងការប្រកួតផងដែរ ខណៈបច្ចុប្បន្នទ្រីយ៉ាត្លុងកំពុងស្វែងរកជំនួយ ដើម្បីបញ្ជូនកីឡាករទៅហ្វឹកហាត់ពង្រឹងនៅក្រៅប្រទេស។ ទោះបីកីឡាទ្រីយ៉ាត្លុងជាប្រភេទវិញ្ញាសាពិបាកក្នុងការស្វែងរកមេដាយ តែកីឡាការិនី អួន ច័ន្ទភត្រា ដែលនឹងតំណាងឲ្យកម្ពុជាក្នុងការប្រកួតកីឡាស៊ីហ្គេមនៅហ្វីពីនឆ្នាំនេះ ហាក់ជឿជាក់ថា នាងនឹងធ្វើបានល្អសម្រាប់ការបង្ហាញខ្លួនលើកដំបូងក្នុងព្រឹត្តិការណ៍នេះ។ ការខិតខំប្រឹងប្រែងហ្វឹកហាត់ និងបទពិសោធចូលរួមការប្រកួតលំដាប់ពិភពលោកលើកដំបូងក្នុងព្រឹត្តិការណ៍ World Police and Fire Games នៅប្រទេសចិន អាចជាកត្តានៃក្តីសង្ឃឹមរបស់នាង។ សម្រាប់ការប្រកួត World Police and Fire Game ដែល អួន ច័ន្ទភត្រា ទទួលបានមេដាយប្រាក់លើវិញ្ញាហែលទឹក១,៥គីឡូម៉ែត្រ ជិះកង់៤០គីឡូម៉ែត្រ និងរត់១០គីឡូម៉ែត្រ កីឡាការិនីវ័យ២០ឆ្នាំរូបនេះ បានឆ្លងកាត់ការប្រកួតប្រជែងជាមួយកីឡាការិនីមានសមត្ថភាពខ្លាំងៗជាច្រើនប្រទេស។ កត្តានេះ វាគឺជាចលករ ដែលធ្វើឲ្យនាងមានជំនឿចិត្តកាន់តែខ្ពស់សម្រាប់ការប្រកួតស៊ីហ្គេម។ បច្ចុប្បន្ននាងរួមជាមួយមិត្តរួមក្រុមដទៃទៀត កំពុងហ្វឹកហាត់យ៉ាងសកម្មជាមួយកាលវិភាគដ៏មមាញឹក ក្រោមការបង្វឹក និងត្រួតពិនិត្យយ៉ាងយកចិត្តទុកដាក់ពីសំណាក់គ្រូបង្វឹក គឺអ្នកស្រី សូរ៉ាន់ ដេត នៅពហុកីឡដ្ឋានជាតិមរតកតេជោ។ «ខ្ញុំមិនទាន់អាចដឹងពីកម្រិតសមត្ថភាពគេយ៉ាងណានោះទេ មិនដឹងថា តើគេខ្លាំងជាងខ្ញុំ ឬខ្ញុំខ្លាំងជាងគេ? តែខ្ញុំប្តេជ្ញាថានឹងតាំងចិត្តមិនភ័យ មិនតក់ស្លុត និងប្រឹងប្រែងប្រកួត ដើម្បីដណ្តើមមេដាយជូនជាតិ។ ព្រោះរាល់ថ្ងៃគ្រូគាត់បានដាក់កម្មវិធីហ្វឹកហាត់ខ្លាំងៗជាងធម្មតាឲ្យពួកយើងហ្វឹកហាត់ ដើម្បីឆ្លើយតបនឹងការប្រកួត»។ នេះជាការលើកឡើងរបស់កីឡាការិនី អួន ច័ន្ទភត្រា ដែលត្រូវប្រកួតលើវិញ្ញាសាឌូអាត្លុង(រត់១០គីឡូម៉ែត្រ ជិះកង់៤០គីឡូម៉ែត្រ និងរត់៥គីឡូម៉ែត្រ)ក្នុងការប្រកួតកីឡាស៊ីហ្គេមនៅហ្វីលីពីន។ មិនខុសគ្នាពីកីឡាការិនី អួន ច័ន្ទភត្រា នោះទេ កីឡាការិនី ហ៊ោ ធីតា ដែលជាបេក្ខភាព១រូបក្នុងការប្រកួតកីឡាស៊ីហ្គេមនៅហ្វីលីពីនផងនោះ ក៏បានបង្ហាញការជឿជាក់លើសមត្ថភាពខ្លួននឹងធ្វើបានល្អផងដែរ។ ធីតា ដែលត្រូវលេងលើវិញ្ញាសាទ្រីយ៉ាត្លុងបណ្តាក់បានតាំងចិត្តយ៉ាងដូច្នេះថា៖«ខ្ញុំសន្យាថានឹងធ្វើឲ្យបានល្អនៅក្នុងការប្រកួត។ យើងមិនដឹងថាកីឡាករគេមានសមត្ថភាពយ៉ាងណានោះទេដោយសារវាជាវិញ្ញាសាថ្មីសម្រាប់ការប្រកួតនេះ ជាហេតុធ្វើឲ្យមិនដឹងកីឡាករ ដែលត្រូវចូលរួមមានកំណត់ត្រាបែបណា។ សម្រាប់ការហ្វឹកហាត់ពីមុនហើយឥឡូវគឺខុសគ្នា ដោយសារឥឡូវយើងសម្រុកខ្លាំង ព្រោះជិតដល់ថ្ងៃប្រកួត បើយើងបន្ធូរក៏មិនបានដែរ»។ ទន្ទឹមនឹងបង្ហាញក្តីរំពឹង និងការប្តេជ្ញា កីឡាការិនី ហ៊ោ ធីតា បង្ហាញពីក្តីកង្វល់ពាក់ព័ន្ធសមត្ថភាពកីឡាករមកពីប្រទេសផ្សេងៗផងដែរ ដោយនាងបានចាត់ទុកកីឡាករម្ចាស់ផ្ទះ សិង្ហបុរី ថៃ វៀតណាម ជាឧបសគ្គដ៏ធំសម្រាប់ការចូលរួមលើកដំបូងរបស់គេ។ ក្នុងចំណោម៣វិញ្ញាសាហែលទឹក ជិះកង់ និងរត់ កីឡាការិនីមានស្រុកកំណើតនៅភ្នំពេញរូបនេះ ចាត់ទុកជិះកង់ ជាវិញ្ញាសាលំបាកហ្វឹកហាត់ និងមានគ្រោះជាងគេ ព្រោះនៅតាមផ្លូវដែលពួកគេហ្វឹកហាត់មានចរាចរណ៍ដ៏មមាញឹកពីអ្នកដំណើរ។ សម្រាប់អ្នកស្រី សូរ៉ាន់ ដេត គ្រូបង្វឹកក្រុមជម្រើសជាតិទ្រីយ៉ាត្លុង បានដាក់ក្តីរំពឹងខ្ពស់លើវិញ្ញាសាឌូអាត្លុង ក្នុងការប្រជែងដណ្តើមមេដាយពីព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះ។ ក្នុងនាមជាគ្រូបង្វឹក អ្នកស្រី នឹងសិក្សាពីកំណត់ត្រារបស់កីឡាករតាមប្រទេសនីមួយៗយកមកប្រៀបធៀបជាមួយកំណត់ត្រារបស់កីឡាករកម្ពុជា ដើម្បីសិក្សាពីចំណុចខ្សោយ និងអភិវឌ្ឍន៍បន្ថែម។ «យើងនឹងសិក្សាពីកំណត់ត្រា(Record)ប្រទេសដទៃនិងកម្ពុជាយើង ថាតើចំណុចណាមួយដែលយើងអាចយកឈ្នះឬចាញ់គូប្រកួត ដើម្បីអភិវឌ្ឍន៍បន្ថែមលើចំណុចខ្សោយទាំងនោះ។ សម្រាប់កម្ពុជាយើងអាចមានសង្ឃឹមដែរលើវិញ្ញាសាឌូអាត្លុងទាំងបុរសនិងនារី»។ នេះជាការលើកឡើងរបស់អ្នកស្រី សូរ៉ាន់ ដេត ដែលបន្ថែមថា សហព័ន្ធកីឡាទ្រីយ៉ាត្លុងកម្ពុជា កំពុងស្វែងរកជំនួយពីដៃគូសហការ ដើម្បីបញ្ជូនកីឡាកររបស់ខ្លួនទៅហ្វឹកហាត់នៅក្រៅប្រទេស ខណៈចិននិងជប៉ុនជាប្រទេសគោលដៅ។ គ្រូបង្វឹករូបនេះបានបន្ថែមទៀតថា ក្នុងករណីស្វែងរកជំនួយឧបត្ថម្ភដើម្បីបញ្ជូនកីឡាករទៅហ្វឹកហាត់ក្រៅប្រទេសមិនបាន សហព័ន្ធនឹងទៅបោះជំរំហ្វឹកហាត់នៅខេត្តកែប ដែលជាទីតាំងសក្តានុព��ក្នុងការអភិវឌ្ឍកីឡាទ្រីយ៉ាត្លុង។ សម្រាប់អ្នកស្រី សូរ៉ាន់ ដេត ទោះការហ្វឹកហាត់នៅប្រទេស ឬក្នុងប្រទេស កីឡាករអាចមានភាពរីកចម្រើនដូចគ្នា ឲ្យតែពួកគេព្យាយាម និងតស៊ូហ្វឹកហាត់។ សម្រាប់ការប្រកួតកីឡាស៊ីហ្គេមនៅប្រទេសហ្វីលីពីនចុងឆ្នាំនេះ សហព័ន្ធកីឡាទ្រីយ៉ាត្លុងកម្ពុជា នឹងបញ្ជូនកីឡាករកីឡាការិនីចំនួន៨រូបឲ្យចូលរួម ដោយពួកគេលេងលើ៣វិញ្ញាសា គឺទ្រីយ៉ាត្លុង ឌូអាត្លុង និងមិចទ្រីយ៉ាត្លុងរីលេ(Mix Relay)។ កីឡាករទាំង៨រូបរួមមានកីឡាការិនី អួន ច័ន្ទភត្រា, ថន សុម៉ាវត្តី, ហ៊ោ ធីតា, ផល រតនា, កីឡាករ នាង ពេជ្រ ពិសិដ្ឋ, កាំង ធឿន, ណាំង ណៃ និងកីឡាករ ជា សម្ផស្ស៕ https://www.thmeythmey.com/?page=detail&id=83376 "ខ្លឹមសារនេះត្រូវបានបោះពុម្ពផ្សាយជាផ្លូវការដោយមានភាពជាដៃគូរវាងសេរីនិងថ្មីៗ"

អួន ច័ន្ទ​ភ​ត្រា ត្រៀមបង្ហាញ​សមត្ថភាព​ដំបូង​នៅ​ស៊ី​ហ្គេម​

Comments

អួន ច័ន្ទភត្រា ត្រៀមបង្ហាញសមត្ថភាពដំបូងនៅស៊ីហ្គេម