ផ្លែស្ដ្រប៊ើរីពណ៌សដ៏កម្រ មួយផ្លែតម្លៃដល់ទៅ ១០ ដុល្លារ
ក្រុងតូក្យូ: មនុស្សភាគច្រើនមិនដែលធ្លាប់បានឃើញ និងភ្លក្សរសជាតិស្ដ្រប៊ើរីពណ៌សនោះទ្បើយ។ ប្រទេសនៅតំបន់អាស៊ីសម្បូរផ្លែស្ដ្រប៊ើរីសម្បុរសប្លែកៗជាច្រើន ស្ថិតក្នុងចំណោម White Jewel ឬស្ដ្រប៊ើរី ស៊ីរ៉ូអ៊ិហូសេគិ ស្ថិតក្នុងប្រភេទកម្រ និងថ្លៃបំផុត។
ផ្លែស្ដ្រប៊ើរី (White Jewels) ត្រូវបានបង្កាត់ឡើងតាំងពី ៤ ឆ្នាំមុន ដោយលោក យ៉ាស៊ូហ៊ីតុ តេស៊ីម៉ា ហើយកសិដ្ឋានរបស់លោកស្ថិតនៅក្នុងខេត្ដសាហ្គា ប្រទេសជប៉ុន នៅតែជាកសិដ្ឋានតែមួយគត់ក្នុងលោកដែលផលិតផ្លែឈើកម្រនេះ។ លោក តេស៊ីម៉ា បានអះអាងថា លោកបានចំណាយពេលជាច្រើនឆ្នាំបង្កាត់ពូជស្ដ្រប៊ើរីប្លែកៗឆ្លងពូជដើម្បីរំលេចឲ្យចេញនូវពណ៌សម្បុរគួរទាក់ទាញ។
អាថ៌កំបាំងមួយក្នុងការដាំស្ដ្រប៊ើរី គឺកាត់បន្ថយការប៉ះត្រូវនឹងកម្ដៅថ្ងៃ ដែលបន្ថយកម្រិតជាតិពណ៌ធម្មជាតិលើផ្លែឈើ និងបន្លែ។ ប៉ុន្ដែផ្លែស្ដ្រប៊ើរីរបស់លោកតែ ១០ ភាគរយដែលប្រែជាពណ៌ស និងមានតែពីរ ឬបីផ្លែដែលចេញពណ៌សក្បុសល្អឥតខ្ចោះ ខណៈផ្លែដទៃនៅតែមានពណ៌ក្រហម ឬផ្កាឈូកស្លេក។
ស្ដ្រប៊ើរីពណ៌សដ៏ស្រស់ស្អាត ត្រូវបានដាក់លក់ក្នុងតម្លៃ ១០ ដុល្លារក្នុងមួយគ្រាប់ ឬមួយកញ្ចប់តូច ៤០ ដុល្លារ។ លោកតេស៊ីម៉ា បានប្រាប់ Great Big Storyថា៖ «វាមានរសជាតិមុតបន្ដិច ទោះវាគ្មានអ្វីប្លែកក៏ដោយ ក៏វាធ្វើឲ្យអ្នកទទួលទានមានអារម្មណ៍ប្លែកតែចុងក្រោយអ្នកនឹងបានដឹង ហើយវាពិតជាឆ្ងាញ់ណាស់»។
លោក ចន ដោប ជាជនបរទេសរស់នៅប្រទេសជប៉ុនមានឱកាសបានភ្លក្សរសជាតិស្ដ្រប៊ើរី ស ខណៈទស្សនកិច្ចកសិដ្ឋានលោកតេស៊ីម៉ានិងបានសរសេរថា៖ «ស្ដ្រប៊ើរីស៊ីរ៉ូអ៊ិហូសេគិមានរសជាតិផ្អែម។ សម្បករបស់វាទន់។ ខាំមួយម៉ាត់ដំបូងបែកហៀរទឹកឈ្ងុយស្រដៀងនឹងផ្លែម្នាស់ តែក៏បាត់ទៅវិញនៅប៉ុន្មានវិនាទីក្រោយ។ វាផ្អែមមិនចាញ់ស្ករគ្រាប់នោះទេ។ តែមិនដល់ថ្នាក់ស្អិតបំពង់កឡើយ។ ខុសពីស្ករគ្រាប់ ជាតិស្ករធម្មជាតិមិនស្ថិតនៅក្នុងមាត់ទេ ដោយវានឹងរលាយក្នុងមាត់ភ្លាម»។
លោកដោប បានបន្ថែមថាផ្លែឈើវប្បធម៌ដ៏កម្រ និងថ្លៃបំផុតរបស់ជប៉ុន ដូចជាស្ដ្រប៊ើរីនេះត្រូវបានទិញសម្រាប់ជាជំនូនកាដូជាជាងបង្អែម។ យ៉ាងណា ស្ដ្រប៊ើរី ស នេះនៅថោកជាងស្ដ្រប៊ើរី កូកូតា ជាពូជស្ដ្រប៊ើរីយក្សក្រហមដ៏កម្រដែលមានជាតិជូរ និងផ្អែមមុត ១ ផ្លែតម្លៃ ២២ ដុល្លារ៕
ប្រភព៖ ភ្នំពេញប៉ុស្តិ៍
0.000 SRY