ថៃ សំឡឹងឃើញ ឱកាសវិនិយោគ ផ្នែកចំណីសត្វ និងការចិញ្ចឹមសត្វនៅខេត្តព្រះសីហនុ

http://i67.tinypic.com/205hn9.jpg កាលពីថ្ងៃម្សិលមិញនេះ លោក យន្ត មីន អភិបាលខេត្តព្រះសីហនុ បានជួបពិភាក្សាការងារជាមួយ លោក Seksan Ruangwohan នាយកប្រតិបត្តិ ផ្នែកវិនិយោគប្រព័ន្ធសេដ្ឋកិច្វថៃ លើការវិនិយោគ ពាណិជ្ជកម្មនៅកម្ពុជា។ នៅក្នុងជំនួបនេះដែរ ភាគីថៃ​ចង់បោះទុន ធ្វើការវិនិយោគ ផ្នែកចំណីសត្វ និងការចិញ្ចឹមសត្វនៅខេត្តព្រះសីហនុ រួមទាំងគោល​បំណង​បោះទុន​លើវិស័យផ្សេងទៀតផងដែរ ក្នុងជំនួបរួមគ្នាមួយ។ លោក យន្ត មីន បានប្រាប់ទៅភាគីថៃថា ខេត្តព្រះសីហនុ ជាបំពង់ក​ សេដ្ឋកិច្ច របស់ប្រទេសកម្ពុជា មានកំពង់ផែទឹកជ្រៅ ដែលមានទំនិញ នាំចេញនាំចូល និងមានកុងតឺន័រឆ្លងកាត់ ៧២ភាគរយ ក្នុងនោះរួមមានវិស័យដឹកជញ្ជូនមានផ្លូវគោក ផ្លូវទឹក ផ្លូវអាកាស។ លោកអភិបាលខេត្តបន្ថែមថា ខេត្តព្រះសីហនុ មានសក្តានុពលតំបន់ឆ្នេរ និងចូលជាសមាជិក​ក្លឹបឆ្នេរស្អាតកាលពីឆ្នាំ២០១១ មានកោះចំនួន ៣២ ជាប្រភពធនធានធម្មជាតិ ដ៏សម្បូរបែប នាំមកនូវទេសចរប្រមាណ ២លាននាក់នៅឆ្នាំ២០១៧ ពិសេសការវិនិយោគនៅខេត្ត ព្រះសីហនុមានការអភិវឌ្ឍ ល្បឿនលឿនផងដែរ។ ភាគីថៃលោក Seksan Ruangwohan ឆ្លើយតបថា ថៃមកទស្សនកិច្ចខេត្តព្រះសីហនុលើកនេះមាន​គោលបំណង ២ គឺ៖ ក្រុម CDC ថៃ និងសភាធុរកិច្ចថៃ-កម្ពុជា ដែលមានក្រុមហ៊ុនចំនួន៣០ ក្នុងគោលបំណងសិក្សា ឈ្វេងយល់ពីសក្តា នុពលវិនិយោគ នៅខេត្តព្រះសីហនុ ហើយគោលបំណង​មួយទៀតក្រុមហ៊ុនថៃ ចង់មកធ្វើការវិនិយោគ ផ្នែកចំណីសត្វ និងការចិញ្ចឹមសត្វនៅខេត្តព្រះសីហនុ។ គួរជម្រាបជូនថា កម្ពុជាមានកំពង់ផែអន្តរជាតិចំនួន៤ ហើយកំពង់ផែធំជាងគេ គឺកំពង់ផែអន្តរជាតិ​ទឹកជ្រៅខេត្តព្រះ​សីហនុនេះឯង។ ខេត្តមានព្រលានយន្តហោះអន្តរជាតិ តាំងពីឆ្នាំ២០១៧ ដែលមានជើងហោះហើរ ត្រង់ទៅកាន់ប្រទេសចិន ម៉ាឡេស៊ី វៀតណាម និងហោះហើរក្នុងស្រុក។ ជាមួយគ្នានេះ ខេត្តជាប់សមុទ្រនេះ មានវិស័យធំៗចំនួន៣គឺ៖ ទី១. សេវាកម្ម, ២.ឧស្សាហកម្ម (រោងចក្រ) មានតំបន់សេដ្ឋកិច្ចពិសេស៣ តំបន់សេដ្ឋកិច្ចធំជាងគេ គឺតំបន់សេដ្ឋកិច្ចពិសេសបិតត្រាំង ដែលមានអ្នកវិនិយោគចិន មកពីខេត្តជាំងស៊ូ ធ្វើការវិនិយោគ ធ្វើឱ្យកំណើនសេដ្ឋ កិច្ចមានការកើនឡើង និង៣. វិស័យទេសចរណ៍ផងដែរ។