វិធីសាស្ត្រធម្មជាតិ ជួយដោះស្រាយរោគរលាកក្រពះ

រោគរលាកក្រពះ គឺជាការរលាកនៃជាលិកាដែលមាននៅតាមផ្នែកខាងក្នុងបង្អស់នៃសរីរាង្គក្រពះ។ បញ្ហាឈឺក្រពះនេះជាទុក្ខកង្វល់មួយដ៏ខ្លាំងរបស់ប្រជាជនខ្មែរយើង ព្រោះភាគច្រើននៃអ្នកកើតជំងឺនេះច្រើនតែរ៉ាំរ៉ៃ ត្រូវការរយៈពេលយូរក្នុងការព្យាបាលហើយត្រូវចំណាយថវិកាយ៉ាងច្រើនទៅលើថ្នាំទៀតផង។ ភាពព្រងើយកន្តើយ និងការមិនយកចិត្តទុកដាក់ទៅលើរោគសញ្ញាដែលសរីរាង្គក្រពះមានបញ្ហា អាចបង្កជាជំងឺកាន់តែធ្ងន់ធ្ងរដូចជាវិវឌ្ឍទៅរកជំងឺខ្ទុះរលាកក្រពះ ជាពិសេសជំងឺមហារីកក្រពះតែម្តង។ ដូច្នេះខាងក្រោមជាចំណេះដឹងខ្លះទាក់ទងនឹងប្រភេទរោគសញ្ញា មូលហេតុ និងវិធីសាស្ត្រក្នុងការបង្ការជំងឺនេះដែលលោកអ្នកគួរចងចាំ និងដឹង៖ ក. ប្រភេទ ១. រោគរលាកក្រពះរយៈពេលខ្លី៖ ជំងឺនេះកើតត្រឹមរយៈពេលខ្លីប៉ុណ្ណោះ ពោលគឺត្រឹម ៧ទៅ១០ថ្ងៃ ហើយពេលខ្លះអាចបាត់ទៅវិញដោយខ្លួនឯង។ ភាគច្រើននៃជំងឺនេះ មានអាការឈឺខ្លាំងភ្លាមៗហើយក៏បាត់ទៅវិញ។ បើដឹង និងព្យាបាលទាន់ពេល វាអាចព្យាបាលជាសះស្បើយ។ ២. រោគរលាកក្រពះរយៈពេលវែង៖ វាមានលក្ខណៈខុសពីជំងឺរលាកក្រពះរយៈពេលខ្លី ត្រង់ថាជំងឺនេះពុំងាយនឹងព្យាបាលឡើយ ហើយចំណាយរយៈពេលយូរខ្លាំង ព្រោះវាមានលក្ខណៈរ៉ាំរ៉ៃ ហើយរោគសញ្ញារបស់វាមានអាការឈឺល្មមៗ ដែលច្រើនធ្វើឲ្យយើងពុំចាប់អារម្មណ៍។ ខ. រោគសញ្ញា រោគសញ្ញានៃជំងឺរលាកក្រពះទាំងពីរប្រភេទនេះក៏ពុំសូវជាខុសគ្នាប៉ុន្មានឡើយ៖ ១. មានអាការដូចជាឈឺស្ទំៗនៅចុងដង្ហើម ២. ញ៉ាំអាហាររួច ចេះតែក្អួត និងមានអារម្មណ៍ឆ្អល់ពោះ ៣. ស្រកទម្ងន់គ្មានមូលហេតុ និងបាត់បង់ចំណង់អាហារ ៤. លាមកមានពណ៌ខ្មៅ ៥. ចេះតែវិលមុខ ឈឺក្បាល អស់កម្លាំង គ. មូលហេតុ ដូចបានរៀបរាប់ខាងលើ រោគរលាកក្រពះមិនថារយៈពេលខ្លី ឬ រ៉ាំរ៉ៃនោះទេ សុទ្ធតែ បង្កឡើងពីការរលាកនូវជាលិកាខាងក្នុងរបស់ក្រពះដូចគ្នា។ ហើយឬសគល់នៃមូលហេតុរលាកនៃជាលិកាទាំងនេះក៏ពុំសូវខុសគ្នាដែរ។ ១. មូលហេតុចំបង៖ * ការប្រើប្រាស់ថ្នាំបំបាត់ការឈឺចាប់ និងថ្នាំបំបាត់អាឡែកស៊ី ញឹកញាប់ * បង្កឡើងដោយបាក់តេរី បង្កជំងឺរលាកប្រព័ន្ធរំលាយអាហារ (Helicobacter pylori) * ការពិសាគ្រឿងស្រវឹងលើសកម្រិត និងញឹកញាប់ពេក ២. មូលហេតុដែលកម្រ៖ * ប្រព័ន្ធភាពស៊ាំរាងកាយអន់ថយ ដែលធ្វើឲ្យពពួកអតិសុខុមប្រាណបង្កនូវបញ្ហារលាកក្រពះ * បញ្ហាស្ត្រេសជាប្រចាំ * ការបរិភោគអាហារមិនទៀងទាត់ * បញ្ហានៃតម្រងនោម * បញ្ហាទឹកប្រម៉ាត់ * ការប្រើប្រាស់កូកាអ៊ីន (ថ្នាំញៀន) ឃ. ដំណោះស្រាយ ១. ការកែប្រែទម្លាប់ ដើម្បីកាត់បន្ថយនូវហានិភ័យ នៃការបង្ករោគរលាកក្រពះទាំងពីរប្រភេទនេះ វាជាការចាំបាច់និងសំខាន់បំផុតដែលយើងត្រូវកាត់បន្ថយនូវបរិមាណនៃការពិសាគ្រឿងស្រវឹងលើសកំណត់ បញ្ឈប់ការជក់បារី ចេះគ្រប់គ្រងនិងកាត់បន្ថយបញ្ហាស្ត្រេស និងព្យាយាមពិសាទឹកឲ្យបានកាន់តែច្រើនកាន់តែល្អ (យ៉ាងតិចណាស់ឲ្យបាន ២លីត្រក្នុងមួយថ្ងៃ)។ ក្រៅពីនេះយើងត្រូវកាត់បន្ថយការប្រើប្រាស់ថ្នាំបំបាត់ការឈឺចាប់ ឬ ថ្នាំអាឡែកស៊ី និងពុំគួរប្រើប្រាស់ថ្នាំផ្តេសផ្តាសដោយគ្មានវេជ្ជបញ្ជាច្បាស់លាស់រាល់ពេលដែលយើងមានអាការឈឺនោះទេ។ ២. វីធីសាស្ត្រធម្មជាតិ ដូច្នេះខាងក្រោមជាអាហារធម្មជាតិពីរប្រភេទ ដែលអាចជួយកាត់បន្ថយអាការនិង អាចព្យាបាលជំងឺរលាកក្រពះទាំងពីរប្រភេទនេះ៖ ក. ការប្រើប្រាស់ខ្ញី យើងអាចប្រើប្រាស់ខ្ញី លាយជាមួយទឹកក្តៅអ៊ុនៗជារៀងរាល់ព្រឹកដើម្បីបង្ការ និង ប្រឆាំងនឹងជំងឺរលាកក្រពះ ពីព្រោះ ៖ * ខ្ញី ជាប្រភពនៃសារធាតុប្រឆាំងនឹងការរលាកដោយធម្មជាតិ ដែលថ្នាំយើងប្រើប្រាស់ទិញពីឱសថស្ថានសុទ្ធតែដកយកនូវសារធាតុពិសេសនេះមកធ្វើជាថ្នាំព្យាបាល * ខ្ញី ក៏សំបូរទៅដោយសារធាតុប្រឆាំងនឹងបាក់តេរីផងដែរ ដែលជាអត្ថប្រយោជន៍ដ៏សំខាន់មួយក្នុងការប្រឆាំងនឹងបាក់តេរី បង្កជំងឺរលាកក្រពះ * ជួយកាត់បន្ថយការបញ្ចេញទឹកអាស៊ីតក្រពះ * ពង្រឹងប្រព័ន្ធភាពស៊ាំរាងកាយ ប្រឆាំងនឹងមេរោគ ខ. ទឹកឃ្មុំធម្មជាតិ ការហូបទឹកឃ្មុំធម្មជាតិសុទ្ធល្អមួយស្លាបព្រាបាយ នៅពេលព្រឹកព្រលឹមដោយពោះទទេរ អាចមានប្រសិទ្ធភាពយ៉ាងខ្លាំងក្នុងការជួយបន្ថយអាការ និងព្យាបាលជំងឺរលាកក្រពះ ដោយសារសារធាតុពិសេសៗមួយចំនួន អាចមានឥទ្ធិពលក្នុងការព្យាបាលកោសិកាដោយធម្មជាតិ៕ប្រភព៖www.khmerload.com