អាមេរិកគ្មានគម្រោងផ្អាកសមយុទ្ធខ្នាតធំជាមួយនឹងកូរ៉េខាងត្បូងទៀតឡើយ
លោក James Mattis រដ្ឋមន្ត្រីក្រសួងការពារជាតិអាមេរិក បានឲ្យដឹងកាលពីថ្ងៃទី២៨សីហាថា ប្រទេសរបស់លោកពុំមានគម្រោងផ្អាកការធ្វើសមយុទ្ធទ្រង់ទ្រាយធំជាមួយនឹងកូរ៉េខាងត្បូង នៅឆ្នាំ២០១៩ ដូចការផ្អាកនៅឆ្នាំ២០១៨ នេះឡើយ។
លោករដ្ឋមន្ត្រីអាមេរិក បានប្រាប់ថា ការដែលផ្អាកសមយុទ្ធឆ្នាំ២០១៨ ព្រោះតែអាមេរិកចង់បង្ហាញកាយវិការល្អ និងទំនុកចិត្តឲ្យកូរ៉េខាងជើង។ យ៉ាងណាមិញ ការបង្ហាញនេះគឺមានដែនកំណត់ច្បាស់លាស់។
“យើង (អាមេរិក) បានចាត់វិធានការផ្អាកនូវសមយុទ្ធខ្នាតធំជាច្រើន ហើយនេះជាការបង្ហាញពីភាពស្មោះត្រង់ ដែលកើតចេញពីជំនួបកំពូលនៅសិង្ហបុរី (ថ្ងៃ ទី១២ មិថុនា ២០១៨)” លោក Mattis ថ្លែង។
គួររំលឹកថា នៅអំឡុងជំនួបកំពូលជាប្រវត្តិសាស្ត្រនៅប្រទេសសិង្ហបុរី លោក គីម ជុងអ៊ុន មេដឹកនាំកូរ៉េខាងជើង បានយល់ព្រមសំណើលុបបំបាត់ចោលនូវកម្មវិធីនុយក្លេអ៊ែរចេញពីឧបទ្វីបកូរ៉េ។ ប៉ុន្តែមកទល់នឹងបច្ចុប្បន្ន គេសង្កេតឃើញថា កូរ៉េខាងជើងមិនទាន់បង្ហាញពីឆន្ទៈ និងសកម្មភាពពិតប្រាកដ ក្នុងការបោះបង់ចោលនូវអាវុធនុយក្លេអ៊ែររបស់ខ្លួនជាឯកតោភាគី ដូចដែលរដ្ឋបាលលោក ដូណាល់ ត្រាំ ទាមទារនោះឡើយ៕
ប្រភព៖ Reuters និងhttp://kleykley.sabay.com.kh ប្រែសម្រួល៖ ឈាង.
0.000 SRY