បញ្ជូនស្ត្រីចិនម្នាក់ទៅតុលាការ ព្រោះធ្វើឲ្យក្រុងភ្នំពេញបាត់បង់ចោរឆក់ម្នាក់
ភ្នំពេញ ៖ ស្ត្រីជនជាតិចិនម្នាក់ ដែលបានបើករថយន្ដដេញតាមបុកចោរឆក់ទូរស័ព្ទ២នាក់ រហូតឲ្យរងរបួសធ្ងន់ និងក្រោយមកបានស្លាប់ម្នាក់ ត្រូវបានសមត្ថកិច្ចចាប់ខ្លួន និងបញ្ជូនទៅតុលាការ នារសៀលថ្ងៃទី១៥ ខែសីហា ឆ្នាំ២០១៨នេះ ពីបទមនុស្សឃាត ក្នុងសកម្មភាពធ្វើឲ្យម្នាក់ស្លាប់ លែងមានលទ្ធភាពបង្កអំពើឆក់ប្លន់ក្នុងរាជធានីភ្នំពេញ ។
បើតាមរបាយការណ៍របស់សមត្ថកិច្ចបានឲ្យដឹងថា ស្ត្រីជនជាតិចិន ដែលត្រូវបានចាត់ទុកជាជនសង្ស័យបង្កឲ្យចោរស្លាប់ និងរបួស មានឈ្មោះ (យួន ថាង) YUAN TANG ភេទស្រី អាយុ២៦ឆ្នាំ ជនជាតិចិន ជាអាជីវករ ស្នាក់នៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ចំណែកជនសង្ស័យជាចោរ ដែលសមត្ថកិច្ចចាត់ទុកថា ជាជនរងគ្រោះ មានឈ្មោះ សារុន ពិសិដ្ឋ ភេទប្រុស អាយុ២៨ឆ្នាំ មុខរបរចោរ ស្នាក់នៅផ្ទះ លេខ២៥០ ផ្លូវលេខ៤៦០ ក្រុម២២ ភូមិ៤ សង្កាត់ទួលទំពូង១ ខណ្ឌចំការមន បានរងរបួសធ្ងន់ និងម្នាក់ទៀតឈ្មោះ បេ សុភាដេវីត ភេទប្រុស អាយុ២៤ឆ្នាំ មុខរបរចោរ ស្នាក់នៅផ្ទះលេខ៣២A ផ្លូវលេខ២៨០ ក្រុម៤៣ ភូមិ៥ សង្កាត់បឹងកេងកង២ ខណ្ឌចំការមន ត្រូវនារីជនជាតិចិនម្នាក់ តាមដេញបុកស្លាប់ ។
គួររំលឹកថា ស្ត្រីជនជាតិចិនម្នាក់ បានបើករថយន្ដដេញតាមបុកជនសង្ស័យជាចោរឆក់ជិះម៉ូតូ២នាក់ តាមដងផ្លូវរហូតបំបុកផ្ទប់ជាមួយរបងផ្ទះប្រជាពលរដ្ឋ បណ្តាលឱ្យរងរបួសធ្ងន់ធ្ងរ និងក្រោយមកស្លាប់ម្នាក់ ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ក្រោមបទល្មើស «ប៉ុនប៉ងឃាតកម្ម» ។
លោក យិន សាន អធិការនគបាលខណ្ឌចំការមន អោយដឹងថា ដោយឡែកស្ត្រីចិនម្នាក់ទៀត ដែលរួមដំណើរក្នុងហេតុការណ៍នោះ មិនត្រូវបានឃាត់ខ្លួនទេ ដោយសារមិនជាប់ពាក់ព័ន្ធ ។ លោកអធិការបានបន្ថែថា ការសម្រេចឃាត់ខ្លួន ស្ត្រីជនជាតិចិននេះ ធ្វើឡើងក្រោមបញ្ជារបស់លោកស្រី វ៉ា សក្កដា ព្រះរាជអាជ្ញរងអមសាលាដំបូងរាជធានីភ្នំពេញ ។
ស្ត្រីជនជាតិចិន២នាក់ ដែលអះអាងថា ត្រូវចោរឆក់ទូរស័ព្ទ រួចបើករថយន្ដដេញបំបុកចោរបណ្តាលឱ្យរងរបួសធ្ងន់ធ្ងរ និងស្លាប់ កាលពីវេលាម៉ោង១១ និង១៥នាទីយប់ថ្ងៃទី១២ សីហា ២០១៨ នៅចំណុចផ្លូវលេខ៤៥៤ កែងផ្លូវលេខ១២៣ ស្ថិតក្នុងសង្កាត់ទួលទំពូង២ ខណ្ឌចំការមន រាជធានីភ្នំពេញ ។
បើតាមស្ត្រីជនជាតិចិនទាំង២នាក់ បានប្រាប់សមត្ថកិច្ចឱ្យដឹងថា នៅមុនកើតហេតុ ពួកនាងបានបើករថយន្តតាមដងផ្លូវ ហើយបានបើកកញ្ចក់ រថយន្តនិយាយទូរស័ព្ទ ខណៈនោះស្រាប់តែត្រូវចោរ២នាក់ ជិះម៉ូតូម៉ាកស្កុបពីពណ៌ស ពាក់ស្លាកលេខ ភ្នំពេញ 1CL-7241 ជិះមកឆក់ទូរស័ព្ទពីដៃគាត់ ហើយជិះម៉ូតូគេចខ្លួនទើបពួកគាត់ បានបើករថយន្ដដេញតាមរហូតបំបុកក្រុមជនសង្ស័យផ្ទប់ ជាមួយរបងផ្ទះប្រជាពលរដ្ឋបណ្តាលឱ្យរបួសយ៉ាងធ្ងន់ធ្ងរ និងត្រូវសមត្ថកិច្ចទាក់ទងរថយន្ដសង្គ្រោះបន្ទាន់ ដឹកទៅកាន់មន្ទីរពេទ្យ ៕
ប្រភព : KBN
0.000 SRY