បារាំងនិងអេស្ប៉ាញចង់ឲ្យអាមេរិកបន្ធូរបន្ថយពន្ធលើដែកថែបនិងអាលុយមីញ៉ូម

ដោយ : តុង បារាំងនិងអេស្ប៉ាញចង់ឲ្យអាមេរិកបន្ធូរបន្ថយពន្ធលើដែកថែបនិងអាលុយមីញ៉ូម ប្រធានាធិបតីបារាំង លោក Emmanuel Macron បានធ្វើដំណើរទស្សនកិច្ចជាផ្លូវការលើកទី១ទៅកាន់ប្រទេស អេស្ប៉ាញ កាលពីថ្ងៃព្រហស្បតិ៍ ដោយជួបពិភាក្សាការងារជាមួយសមភាគីអេស្ប៉ាញ លោក Pedro Sanchez​ នៅវិមាន Moncloa ក្នុងទីក្រុង ម៉ាឌ្រីដ។  លោក Macron និង លោក Sanchez​ បានឯកភាពគ្នាបន្តអនុវត្តការងាររួមគ្នា និងផ្លាស់ប្តូរទស្សនៈរួមគ្នាអំពីបញ្ហាអន្តោប្រវេសន៍។ ប្រមុខដឹកនាំទាំងពីរនេះក៏បានស្វាគមន៍ការអំពាវនាវក្នុងសប្តាហ៍នេះឲ្យមានការផ្អាកសង្គ្រាមពាណិជ្ជកម្មរវាងអាមេរិកនិងអឺរ៉ុបផងដែរ ប៉ុន្តែបានទាមទារឲ្យមានវិធានការពីក្រុមសម្ព័ន្ធមិត្តរបស់ខ្លួនពីទូទាំងតំបន់អាត្លង់ទិកឲ្យមានកាត់បន្ថយពន្ធនិងបដិសេធមិនចរចាកិច្ចព្រមព្រៀងពាណិជ្ជកម្មថ្មីជាមួយអាមេរិក។  លោក Macron ក៏បានរិះគន់លើក្រុមអ្នកកាសែតជុំវិញបញ្ហារបស់អតីតទីប្រឹក្សាផ្នែកសន្តិសុខរបស់លោក ដែលត្រូវបានគេឃើញប្រើ អំពើហិង្សាវាយអ្នកតវ៉ាម្នាក់នៅក្នុងរូបភាពវីដេអូ ដែលកាសែត Le Monde បញ្ចេញកាលពីសប្តាហ៍មុនដែរ។  ការិយាល័យរបស់លោក Macron បានរងការរិះគន់យ៉ាងខ្លាំងដោយសារតែលាក់បាំងបញ្ហានេះ និងមិនបង្ហាញវិធានការពិន័យលើ លោក Alexandre Benalla មុនពេលបញ្ឈប់តំណែងរបស់អតីតទីប្រឹក្សារូបនេះកាលពីសប្តាហ៍មុននោះ៕