ផ្ទុះអំពើហិង្សាក្នុងបាតុកម្មទាមទារសិទ្ធិរំលូតកូននៅក្នុងប្រទេសឈីលី

ផ្ទុះអំពើហិង្សាក្នុងបាតុកម្មទាមទារសិទ្ធិរំលូតកូននៅក្នុងប្រទេសឈីលី ការប៉ះទង្គិចគ្នាបានផ្ទុះឡើងនៅក្នុងទីក្រុង Santiago ក្នុងអំឡុងពេលមានការដង្ហែក្បូនតវ៉ាទាមទារសិទ្ធិរំលូតកូន។ ប៉ូលីសបានឲ្យដឹងថា ស្ត្រីបីនាក់ត្រូវបានចាក់នឹងកាំបិត ហើយកំពុងទទួលការព្យាបាលដោយពុំមានគ្រោះថ្នាក់ដល់ជីវិតឡើយ។ មេបញ្ជាការប៉ូលីសម្នាក់ក៏បានរងរបួសនៅក្នុងហេតុការណ៍នេះដែរ។  មនុស្សជាច្រើននាក់បានដង្ហែក្បួនតាមដងវិថីនានាក្នុងទីក្រុងនៃប្រទេស ឈីលី ហើយបាតុករមួយចំនួនកាន់ពិលនិងបដាទាមទារសិទ្ធិរំលូតកូនដោយ សេរីនិងប្រកបដោយសុវត្ថិភាព ប៉ុន្តែប៉ូលីសបានព្យាយាមបាញ់ទឹកបំបែកពួកគេ។ ក្រុមបាតុករបានពាក់កន្សែងពណ៌បៃតង ដែលតំណាងឲ្យចលនាទាមទារសិទ្ធិរំលូតកូន។  បាតុកម្មដោយឡែកផ្សេងៗទៀតក៏បានផ្ទុះឡើងដែរនៅតាមទីក្រុងនានានៃប្រទេស ឈីលី ដែរ។ កាលពីឆ្នាំមុន តុលាការធម្មនុញ្ញនៃ ប្រទេស ឈីលី បានតម្កល់វិធានការ ដែលនឹងលើកលែងការហាមឃាត់ទាំងស្រុងលើការរំលូតកូន ដោយអនុញ្ញាតិឲ្យមានការរំលូត កូននៅពេលជីវិតម្តាយស្ថិតក្នុងភាពគ្រោះថ្នាក់ នៅពេលគត៌មិនអាចលូតលាស់បាន និងក្នុងករណីមានគត៌ដោយការចាប់រំលោភប៉ុណ្ណោះ។  ឈីលីគឺជាអតីតប្រទេសចុងក្រោយគេនៅអាមេរិកខាងត្បូង ដែលធ្លាប់ហាមឃាត់មិនឲ្យមានការរំលូតកូនក្នុងគ្រប់ករណីទាំងអស់ ហើយប្រទេសមួយចំនួននៅអាហ្វ្រិកកណ្តាលនៅតែហាមឃាត់ដាច់ខាតដដែល៕