my bio
http://i68.tinypic.com/2pquqlj.jpg
សួស្ដីអ្នកទាំងអស់គ្នា!
ស្វាគមន៍ដែលបានចូលមកកាន់ សេរីរបស់ខ្ញុំ។ នាងខ្ញុំមានឈ្មោះថា ឡាលីនខ្ញុំបានចាប់កំណើតនៅក្នុងភូមិមួយនៃទឹកដីខេត្ត កំពង់ចាម។ ខ្ញុំជាតិខ្មែរ ហើយក៏គ្រាន់តែជាសាមញ្ញជនម្នាក់ដូចគេឯង ។ ជារឿយៗខ្ញុំចូលចិត្តការអាន ស្ដាប់ និងសរសេរច្រើន អ្វីដែលជាទម្លាប់របស់ខ្ញុំគឺការនៅស្ងប់ស្ងាត់ច្រើនជាងការចូលរួមកម្មវិធី មនុស្សអ៊ូអរ ។
ដំបូង ខ្ញុំគ្រាន់តែចូលចិត្តសរសេរកំណត់ហេតុប្រចាំថ្ងៃទុក ហើយពេលដែលទំនេរក៏យកវាមកអាន រហូតដល់ពេលមួយដែលជាឱកាសល្អដែលបាននាំខ្ញុំមកដល់ទីនេះ ។ ជាការល្អដែល ខ្ញុំអាចសរសេរ និង ចែករំលែកអ្វីដែលជាចំណេះដឹងស្ដួចស្ដើងដល់អ្នកអានគ្រប់គ្នា និងអាចទុកជាកំណត់ហេតុអនុស្សាវរីយ៍តម្កល់ទុកនៅទីនេះ សម្រាប់កូនចៅរបស់ខ្ញុំជំនាន់ក្រោយបានអាន និង ពិចារណា ។
មានមនុស្សជាច្រើនបាននិយាយថា ខ្ញុំចូលចិត្តសរសេរភាគច្រើនគឺរឿងកម្សត់ អន្លង់លន្លោច…. ។ និយាយទៅបទពិសោធន៍ជីវិតនៃការរស់នៅបានធ្វើ អោយខ្ញុំក្លាយជាមនុស្សផ្តាច់ខ្លួនពីពិភពលោកស្រស់ស្អាតមួយ។ អ្វីដែលខ្ញុំធំដឹងក្ដី គឺមានការលំបាក និង តស៊ូដោយខ្លួនឯងច្រើន ម្ល៉ោះហើយខ្ញុំហាក់ដូចជាត្រូវបែងចែកពីការសប្បាយក្អាកក្អាយ និង ភាពហ៊ឺហា ដាច់ស្រលះ ។ អ្វីដែល ខ្ញុំបានឃើញគឺសង្គមដែលពោរពេញទៅដោយរឿងសោកសៅ ព្រាត់ប្រាស់ អត់ឃ្លាន និងភាពអយុត្តិធម៌… ទាំងអស់នេះមិនមែនជាកំហុសរបស់ខ្ញុំទេ ដែលវាបានដិតដាមជាមួយខ្ញុំរហូតមក ។
ទោះជាមានការលំបាកលំបិនយ៉ាងណាក៏ត្រូវតែតស៊ូទៅមុខ ព្រោះជីវិតមានអ្វីជាច្រើនដែលត្រូវធ្វើ។ ពេលនេះខ្ញុំមានជីវភាព និង មានការងារល្អប្រសើរក្រោយពីឆ្លងកាត់ព្យុះភ្លៀងជាច្រើនក្នុងជីវិត ។ ខ្ញុំមិនដឹងទេថាការសរសេររបស់ខ្ញុំល្អ ឬខ្វះខាតកម្រិតណា ប៉ុន្តែសង្ឃឹមថាវាអាចផ្ដល់ជាប្រយោជន៍ខ្លះៗដល់អ្នកអាន ។
0.000 SRY