គុណភាពខ្យល់កម្ពុជាល្អធម្មតា ទោះបីនៅថៃ វៀតណាម ទទួលរងឥទ្ធិពលខ្យល់កខ្វក់ក៏ដោយ
ដោយ: ម៉េងឆៃ,មុនីរ័ត្ន / ភ្នំពេញ: ទោះបីជានៅប្រទេសថៃ និងនៅប្រទេសវៀតណាម ក្នុងរយៈពេលប៉ុន្មានថ្ងៃនេះ មានបញ្ហាខ្យល់កខ្វក់កើតឡើង រហូតដល់មានការប្រកាសឲ្យប្រុងប្រយ័ត្នយ៉ាងណាក៏ដោយ ក៏នៅប្រទេសកម្ពុជា ពិសេសនៅភ្នំពេញ និងតាមបណ្តាខេត្តនានា ក៏ដូចជាខេត្តនៅជាប់ព្រំដែន គឺមិនមានផលប៉ះពាល់អ្វីទេ។ ទន្ទឹមនឹងនេះ មន្ត្រីជំនាញកម្ពុជាក៏បានបន្តតាមដានឧបករណ៍វាស់ស្ទង់ខ្យល់ ហើយវាយតម្លៃ ២៤ម៉ោងម្តង។ នេះបើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបញ្ជាក់។
លោក នេត្រ ភក្ត្រា បានប្រាប់រស្មីកម្ពុជាកាលពីរសៀលថ្ងៃទី១ខែកុម្ភៈថា ទោះបីជានៅប្រទេសថៃ និងប្រទេសវៀតណាម ដែលជាប្រទេសជិតខាងយើង កើតមានបញ្ហាខ្យល់កខ្វក់យ៉ាងណាក៏ដោយ ក៏កម្ពុជាយើង មិនទទួលរងឥទ្ធិពលនោះនៅឡើយទេ។ ជាមួយគ្នានោះ ទោះបីជានៅរដូវប្រាំងនេះ មានប្រជាកសិករមួយចំនួន បានកាប់គាស់ឆ្ការព្រៃ ដុតព្រៃ បង្កើតជាខ្យល់ផ្សែង តែមិនប៉ះពាល់ដល់គុណភាពខ្យល់ទេ។ មន្ត្រីជំនាញបានប្រើប្រាស់ឧបករណ៍វាស់ស្ទង់ខ្យល់រៀងរាល់ ២៤ម៉ោង ម្រតង ហើយលទ្ធផល បញ្ជាក់ថា ខ្យល់នៅប្រទេសកម្ពុជាយើង ល្អបរិសុទ្ធ ទាំងនៅភ្នំពេញ និងទាំងនៅតាមបណ្តាខេត្តដទៃទៀត ទូទាំងប្រទេស។
លោក នេត្រ ភក្ត្រា បានបន្ថែមថា ទោះបីជាពេលនេះ នៅកម្ពុជាយើង មិនទាន់ទទួលរងឥទ្ធិពលខ្យល់កខ្វក់ដូចនៅប្រទេសថៃនិងវៀតណាមក៏ពិតមែន ប៉ុន្តែមន្ត្រីជំនាញរបស់ក្រសួងបរិស្ថាន បានបន្តតាមដានជាប្រចាំ និងវាយតម្លៃរៀងរាល់ ២៤ម៉ោងម្តង លើបរិយាកាសខ្យល់អាកាស។ លទ្ធផលជាបន្តបន្ទាប់របស់អ្នកជំនាញ បញ្ជាក់ថា បរិយាកាសខ្យល់អាកាសនៅប្រទេសកម្ពុជាយើង មានគុណភាពល្អធម្មតា។
ការគូសបញ្ជាក់របស់អ្នកនាំពាក្យក្រសួងបរិស្ថានខាងលើនេះបានធ្វើឡើង ខណៈដែលនៅប្រទេសវៀតណាម ពិសេសនៅប្រទេសថៃឥទ្ធិពលខ្យល់កខ្វក់ បានធ្លាក់ចុះខ្លាំងដល់កម្រិតគ្រោះថ្នាក់ ដោយមានកម្ទេចធូលីជាច្រើន ដែលគេស្គាល់ឈ្មោះថា PM2.5 ដែលភាគល្អិតនៃធូលី មានទំហំតូចជាង ២.៥ មីក្រូម៉ែត្រ ហើយត្រូវបានចាត់ទុកថា មានគ្រោះថ្នាក់បំផុត ដោយសារទំហំដ៏តូចរបស់វា អាចចូលជ្រៅទៅក្នុងសួតនិងប៉ះពាល់សរីរាង្គផ្សេងទៀត។ ខ្យល់កខ្វក់ទាំងនោះ កើតឡើងដោយសារតែផ្សែងចេញពីរោងចក្រ និងមធ្យោបាយដឹកជញ្ជូន។
ទាក់ទងនឹងបញ្ហានេះ ស្ថានឯកអគ្គរាជទូតកម្ពុជា ប្រចាំប្រទេសថៃបានអំពាវនាវឲ្យប្រជាពលរដ្ឋខ្មែរដែលមានវត្តមាននៅក្នុងប្រទេសថៃទាំងអស់មេត្តាថែរក្សាសុខភាព និងមានការប្រុងប្រយ័ត្នខ្ពស់ដោយពាក់ម៉ាសការពារប្រភេទ N95 ដោយសារបញ្ហាខ្យល់កខ្វក់។ នេះបើយោងតាមសេចក្ដីជូនដំណឹងរបស់ស្ថានទូតកម្ពុជាប្រចាំនៅប្រទេសថៃ កាលពីថ្ងៃទី៣១ ខែមករា ឆ្នាំ២០១៩។
ស្ថានឯកអគ្គរាជទូតកម្ពុជាបានបញ្ជាក់ថា ដោយសារឥទ្ធិពលខ្យល់កខ្វក់ PM2.5 នៅតំបន់មួយចំនួននៅប្រទេសថៃ មានការកើនឡើងជាលំដាប់ដែលបណ្ដាលឲ្យប៉ះពាល់ដល់សុខភាព ខ្យល់កខ្វក់នៅក្រុងបាងកក និងខេត្តជាច្រើន ដូចជា ខេត្តសាមុទ្រប្រាកាន ខេត្តសមុទ្រសាខន ខេត្តនន្ទបុរី ខេត្តណាខនប៉ាធុម ជាដើម បានធ្លាក់ចុះខ្លាំងដល់កម្រិតគ្រោះថ្នាក់ ដោយសារមានកម្ទេចធូលីជាច្រើនគេស្គាល់ឈ្មោះថា PM2.5 ដែលភាគល្អិត នៃធូលីមានទំហំ ២,៥មីក្រូម៉ែត្រ ហើយត្រូវបានចាត់ទុកថា មានគ្រោះថ្នាក់បំផុត ដោយសារទំហំដ៏តូចរបស់វាអាចចូលជ្រៅទៅក្នុងសួត និងប៉ះពាល់សរីរាង្គផ្សេងទៀត។
ស្ថានទូតកម្ពុជាប្រចាំប្រទេសថៃបញ្ជាក់ទៀតថា ទាក់ទងនឹងបញ្ហានេះ រាជរដ្ឋាភិបាលប្រទេសថៃ បានប្រកាសឲ្យសាលារៀន និងគ្រឹះស្ថានអប់រំមួយចំនួន បិទដំណើរការជាបណ្ដោះ អាសន្ន ក្នុងគោលបំណងការពារសុវត្ថិភាពសុខភាពរបស់សិស្សនិស្សិតទាំងអស់។
ក៏ប៉ុន្តែយ៉ាងណាក៏ដោយ រហូតដល់ថ្ងៃទី១ ខែកុម្ភៈ ឆ្នាំ២០១៩ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់យ៉ាងច្បាស់ជូនសាធារណជនថា នៅប្រទេសកម្ពុជាយើង មិនថានៅភ្នំពេញ ឬតាមបណ្តាខេត្តនានាទូទាំងប្រទេសនោះទេ គឺមន្ត្រីជំនាញបានតាមដាន តាមឧបករណ៍វាស់ស្ទង់ខ្យល់ ហើយវាយតម្លៃរៀងរាល់ ២៤ម៉ោងម្តង ដោយបញ្ជាក់ថា ខ្យល់នៅកម្ពុជាយើង មានគុណភាពល្អ មិនរងឥទ្ធិពលខ្យល់កខ្វក់ពីប្រទេសជិតខាងនោះទេ។
សូមជម្រាបថា ផ្សែងអ័ព្ទពុលបានបង្ខំឱ្យក្រុមអាជ្ញាធរក្រុងបាងកកចេញបទបញ្ជាដែលមិនធ្លាប់មានពីមុនមក គឺបិទសាលារៀនជិត៤៥០កន្លែង កាលពីថ្ងៃពុធ ទី៣០ ខែមករា ឆ្នាំ២០១៩ ស្របពេលដែលក្រុមអាជ្ញាធរខំប្រឹងប្រែងដោះស្រាយវិបត្តិបរិយាកាសផ្សែងអ័ព្ទពុលដែលបានធ្វើឱ្យមានការព្រួយបារម្ភខ្លាំងឡើង។
ទីក្រុងបាងកកត្រូវបានគ្របដណ្ដប់ដោយផ្សែងអ័ព្ទដ៏ក្រាស់អស់ជាច្រើនសប្ដាហ៍ដោយបង្ខំពួកអ្នកស្រុកពាក់ម៉ាស និងធ្វើការរិះគន់តាមប្រព័ន្ធផ្សព្វផ្សាយសង្គមចំពោះការឆ្លើយតបមិនបានល្អប្រសើរដោយរដ្ឋាភិបាលនេះ។ ទន្ទឹមនេះ លោកនាយករដ្ឋមន្ត្រីថៃ ប្រាយុទ្ធចាន់អូចា ក៏បានអំពាវនាវដល់ពលរដ្ឋរបស់ខ្លួន ឲ្យប្តូរពីការប្រើប្រាស់មធ្យោបាយផ្ទាល់ខ្លួន មកប្រើមធ្យោបាយសាធារណៈវិញ ក្នុងបំណងជួយកាត់បន្ថយនូវការបង្កើតផ្សែងបំពុលក្នុងទីក្រុងបាងកក។
ហេតុផលជាច្រើនដែលបង្កឱ្យមានផ្សែងអ័ព្ទអាក្រក់និងអស់ពេលជាយូរមកនេះ គឺបណ្តាលមកពីផ្សែងចេញពីយានយន្តដែលធ្វើចរាចរការសាងសង់ច្រើនគ្មានសណ្តាប់ធ្នាប់ ការដុតស្មៅតាមស្រែចម្ការ និងបរិយាកាសពុលចេញពីរោងចក្រនានានៅទីក្រុងនេះ រួមទាំងផ្សែងមកពីការបូជាសពផងដែរ៕ ល
0.000 SRY