ដើរចូលព្រៃស្រាប់តែប្រទះឃើញរោងដ៏ស្អាតកណ្ដាលព្រៃជ្រៅក៏នៅចាំមើលម្ចាស់!
ប្លែកៗ៖ បុរសម្នាក់បានដើរចូលព្រៃជ្រៅ ក៏ប្រទះឃើញរោងតូចមួយដែលមានការរៀបចំយ៉ាងមានរបៀបរៀបរយ និងផ្លែបេរីព្រៃនៅគរលើគ្នាម្ដុំៗគួរឲ្យចាប់អារម្មណ៍ និងភ្ញាក់ផ្អើលមែនទែន។
ដំបូងឡើយ គាត់គិតថាប្រហែលជាមានមនុស្សមកសង់រោង សម្រាប់រក្សាទុកផ្លែឈើ។ រោងនោះមានវិមាត្រ ៣០សង់ទីម៉ែត្រ គ្របពីលើដោយមែកឈើតូចៗជុំជិត និងមានមែកឈើធំពីរបីជាសសរបង្គោលសម្រាប់ទ្រ។ ចំណែកនៅលើដំបូលមានស្មៅជាច្រើនដើមដាក់តម្រៀបគ្នា ទំនងសម្រាប់ទប់កម្ដៅ ភ្លៀង ខ្យល់។
អ្វីធ្វើឲ្យអ្នកដើរផ្សងព្រេងកាន់តែចាប់អារម្មណ៍បន្ថែមទៀតនោះ គឺក្នុងរោងនេះមានការខណ្ឌចែកជាផ្នែកៗសម្រាប់ដាក់ប្រភេទផ្លែឈើព្រៃខុសៗគ្នា។ បុរសដដែលទាល់គំនិតគិតមិនចេញ ទាំងនឹកក្នុងចិត្តចង់ដឹងអ្នកណាមកសង់រោងខ្ទមនៅក្នុងព្រៃជ្រៅបែបនេះ។ ហេតុការណ៍កើតឡើងនៅក្នុងព្រៃនៅតំបន់មួយ របស់ប្រទេសអូស្ត្រាលី។
ដោយក្ដីអន្ទះសាចង់ឃើញ គាត់បានសម្រេចចិត្តពួនសម្ងំចាំមើលនៅក្បែររោងនោះ។ រង់ចាំមិនចេះតិចនាទី គឺរហូតដល់ប្រមាណពីរបីម៉ោងទើបម្ចាស់រោងនោះបង្ហាញខ្លួនមកឲ្យឃើញប្រាកដមែន។ ម្ចាស់កន្លែងខាងលើ ពិតជាធ្វើឲ្យអ្នកផ្សងព្រេងមិននឹកស្មានមែន ម្ចាស់នោះ ជាបក្សីមួយក្បាលប្រភេទ Vogelkop Bowerbird ដែលវត្តមានវានៅអូស្ត្រាលី និងប្រទេសកោះ Papua New Guinea។
បុរសដដែលបានដើរពិនិត្យមើលជុំវិញរោងឈើ និងពិនិត្យលើមែកឈើ រួចសន្និដ្ឋានថា បក្សីនេះអាចចំណាយពេលសង់សំបុកដ៏ស្មុកស្មាញនេះប្រើរយៈពេលប្រមាណ ១០ខែ។ នៅខាងមុខរោង វាបានទុកដាក់ផ្លែឈើព្រៃដែលខំពាំពីកន្លែងនានា មកតម្រៀបដាក់តាមប្រភេទ ដូចជាវាស្គាល់ផ្លែឈើច្បាស់ និងពុំមានសំរាមរញ៉េរញ៉ៃនៅរាយប៉ាយឡើយ។
មនុស្សជាច្រើនយល់ថា បក្សីនេះប្រាកដជាបក្សីញីហើយ បានជារៀបចំបរិវេណសំបុកយ៉ាងស្រស់ស្អាតដូច្នេះ ប៉ុន្តែប្រភពពីបុរសខាងលើបញ្ជាក់ថា បក្សីនេះមិនមែនញីទេ គឺឈ្មោលទៅវិញ ហើយវាជ្រើសរើសផ្លែឈើព្រៃពណ៌ឆើតៗ និងដាក់ឲ្យមានរបៀប ព្រោះដើម្បីទាក់ទាញបក្សីញីចុះមកស៊ី និងមានឱកាសបង្កាត់ពូជជាមួយគ្នា៕
ប្រភព៖ khmerload
0.000 SRY