៚ គ.ជ.ប៖ រយៈពេល១១ថ្ងៃ ពលរដ្ឋចុះឈ្មោះថ្មី មានចំនួនជិត១០ម៉ឺននាក់q

 គ.ជ.ប៖ រយៈពេល១១ថ្ងៃ ពលរដ្ឋចុះឈ្មោះបោះឆ្នោតថ្មី មានចំនួនជិត១០ម៉ឺននាក់ (ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា រយៈពេល១១ថ្ងៃកន្លងមកនេះ ប្រជាពលរដ្ឋខ្មែរគ្រប់អាយុបោះឆ្នោត ៩​៧,០៣៥នាក់​ បានចុះឈ្មោះក្នុងបញ្ជីឈ្មោះបោះឆ្នោតថ្មី ដែលរៀបចំឡើងដោយ គ.ជ.ប។ របាយការណ៍បានបង្ហាញផងដែរថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១៨ ដែលធ្វើឡើងពីថ្ងៃទី០១ ដល់ថ្ងៃទី១១ ខែតុលា​នេះ គ.ជ.ប បានសម្រេចលុបឈ្មោះអ្នកបោះឆ្នោត ១៤,២៤៧នាក់ ចេញពីបញ្ជីឈ្មោះបោះឆ្នោត និង៧៧៩នាក់ទៀត បានកែតម្រូវទិន្នន័យមួយចំនួន។ គ.ជ.ប បានគូសបញ្ជាក់ថា ដំណើរការពិនិត្យ និងចុះឈ្មោះបោះឆ្នោតនៅឆ្នាំ២០១៨នេះ នៅសល់រយៈពេលតែ៧ថ្ងៃប៉ុណ្ណោះ នឹងត្រូវបិទបញ្ចប់ហើយ។ ក្នុងន័យនេះ គ.ជ.ប បានអំពាវនាវដល់ប្រជាពលរដ្ឋខ្មែរ ដែលបានចុះឈ្មោះរួចហើយសូមទៅពិនិត្យឈ្មោះ ដើម្បីកែតម្រូវចំណុចដែលខុសឆ្គងកន្លងមក។ ដោយឡែកប្រជាពលរដ្ឋទើបគ្រប់អាយុ ១៨ឆ្នាំ (កើតមុន ឬកើតត្រឹមថ្ងៃទី០១ ខែមករា ឆ្នាំ២០០១) និងប្រជាពលរដ្ឋមិនធ្លាប់ បានចុះឈ្មោះបោះឆ្នោតពីមុនមក ក៏សូមអញ្ជើញរួសរាន់ទៅចុះឈ្មោះឱ្យបានគ្រប់ៗគ្នា ដើម្បីមានសិទ្ធិចូលរួមបោះឆ្នោតក្រុមប្រឹក្សាឃុំ-សង្កាត់ ក៏ដូចជាបោះឆ្នោតជ្រើសតាំងតំណាងរាស្ត្រ៕ ប្រភព Fresh News