កិច្ចប្រជុំលើកទី១ ស្តីពីកិច្ចសហប្រតិបត្តិការក្នុងវិស័យគាំពារបរិស្ថានបានបញ្ចប់

   កិច្ចប្រជុំលើកទី១ ស្តីពីកិច្ចសហប្រតិបត្តិការក្នុងវិស័យគាំពារបរិស្ថានបានបញ្ចប់ដោយជោគជ័យ ....................................... នៅល្ងាចថ្ងៃអង្គារ ៥រោច ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៨ នាទីក្រុងម៉ូស្គូ សហព័ន្ធរុស្ស៊ី ក្រុមការងារស្តីពីកិច្ចសហប្រតិបត្តិការក្នុងវិស័យគាំពារបរិស្ថានកម្ពុជា-រុស្ស៊ី បានបញ្ចប់នូវកិច្ចពិភាក្សាការងាររបស់ខ្លួន ដោយឯកភាពគ្នាលើចំណុចមួយចំនួនសម្រាប់កំណត់ក្នុងផែនការការងារសម្រាប់ការអនុវត្តតាមខ្លឹមសារនៃអនុស្សារណៈយោគយល់គ្នាស្តីពីកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវចម្រុះ និងកិច្ចសហប្រតិបត្តិការដើម្បីការអភិវឌ្ឍដោយចីរភាព។ កិច្ចប្រជុំបានឯកភាពផែនការការរួមគ្នាសំដៅឆ្លើយតបនឹងវិសាលភាពការងារដូចមានចែងនៅក្នុងអនុស្សារណៈយោគយល់គ្នាកន្លងមក។ ក្រុមការងារនៃប្រទេសទាំង២ កម្ពុជា-រុស្សុីនឹងជួបប្រជុំគ្នាលើកទី២ នៅព្រះរាជាណាចក្រកម្ពុជា នៅឆ្នាំ២០១៩។ សូមបញ្ជាក់ថា នេះជាកិច្ចប្រជុំ សម្រាប់រៀបចំផែនការ ការងារសហប្រតិបត្តិការទ្វេភាគី ដែលនឹងត្រូវដាក់ពិនិត្យសម្រេចនៅដើមឆ្នាំ២០១៩ ក្នុងជំនួបរវាងរដ្ឋមន្ត្រីបរិស្ថាននៃប្រទេសទាំង២ កម្ពុជា-រុស្សី នៅខែមករា ឆ្នាំ២០១៩ ខាងមុខ នៅប្រទេសកម្ពុជា៕ អត្ថបទ ក្រសួងបរិស្ថាន