ការសិក្សាមាន ៤តំណាក់កាល និង៤ចំណុចផ្សេងៗគ្នា
សិក្សាមាន៤
..............
_សិក្សានៅសាលា
_សិក្សាជាមួយមិត្តភ័ក្តិ
_សិក្សាស្រាវជ្រាវដោយខ្លួនឯង
_សិក្សាតាមរយ:ការអនុវត្តក្នុងសង្គមជាក់ស្តែង ។
.ចំពោះការសិក្សា បើចង់ចេះ មិនមែនគ្រាន់តែទៅសាលាហើយមកផ្ទះវិញគឺចេះនោះទេ ក៏គួរតែរៀនរបៀបសិក្សាផងដែរ ដើម្បីអោយងាយចាំ ងាយចេះ ងាយយល់ អាចធ្វើបាន។
ទីមួយៈ សកម្មភាពក្នុងថ្នាក់រៀន ត្រូវសិក្សាដោយយកចិត្តទុកដាក់ ពោលគឺត្រូវស្តាប់ឲ្យបានល្អ ស្តាប់ហើយគិតពិចារណា បើឆ្ងល់កន្លែងណាត្រូវសាកសួរ បើបានយល់ជាក់ច្បាស់ហើយត្រូវកត់ចំណាំទុក ទាំងក្នុងខួរក្បាល ទាំងក្នុងសៀវភៅ។
ទីពីរៈ ត្រូវសិក្សាជាមួយមិត្តភ័ក្តិបន្ថែម មិត្តភ័ក្តិណាដែលមានចំណេះដឹងច្រើនជាង គប្បីចូលទៅស្មាគម ចូលទៅសិក្សា និងសាកសួរនូវអ្វីដែលអ្នកយល់មិនច្បាស់។ តែប្រសិនបើចេះជំនាញហើយ ក៏គួរតែចែករំលែកទៅដល់អ្នកដែលខ្សោយជាងខ្លួនវិញផងដែរ ព្រោះយើងរមែងបាននាមថាជាមិត្តល្អ និងទទួលបាននូវក្តីស្រលាញ់ពីមិត្តនោះ ម្យ៉ាងទៀត វាក៏អាចធ្វើឲ្យយើងកាន់តែជាក់ច្បាស់មេរៀននឹងបន្ថែមទៀតផងដែរ សូមកុំកំណាញ់ចំណេះដឹងអី
ព្រោះការកំណាញ់ចំណេះដឹងមានតែខាតបង់ប៉ុណ្ណោះ គ្មានឡើយពាក្យថាចំណេញសម្រាប់អ្នកសិក្សា។
ទីបីៈ ការខិតខំសិក្សាបន្ថែមដោយខ្លួនឯងនៅឯផ្ទះ តាមរយៈការសិក្សាស្រាវជ្រាវ តាមឯកសារ សៀវភៅ ព័ត៌មាន ហ្វេសប៊ុក ឬទូរទស្សន៍ជាដើម។ ការសិក្សាស្រាវជ្រាវដោយខ្លួនឯង គឺអាចធ្វើឲ្យយើងកាន់តែស្ទាត់ជំនាញនូវមេរៀនដែលរៀនពីគ្រូ ព្រមទាំងអាចទទួលបាននូវចំណេះដឹងបន្ថែមទៀត ដែលមិនធ្លាប់ដឹង មិនធ្លាប់បានរៀននៅសាលា។
ទីបួនៈ ការសិក្សាតាមរយៈការអនុវត្តនៅក្នុងសង្គមជាក់ស្តែង គឺរៀនធ្វើនូវអ្វីដែលខ្លួនបានរៀនបានសិក្សានៅក្នុងសៀវភៅ ។ការសិក្សាចុងក្រោយនេះ ជាការសិក្សាសំខាន់ ព្រោះជាការធ្វើតេស្តចំពោះចំណេះដឹងពិតដើម្បីទទួលបាននូវបទពិសោធន៍ច្បាស់លាស់ និងអាចយកទៅប្រើប្រាស់ជាប្រយោជន៍ក្នុងសង្គមជាក់ស្តែង បាន។ ដំណាក់កាលនេះ វាប្រហែលជាលំបាកបន្តិចហើយ ទាមទារឲ្យយើងមានសេចក្តីអត់ធន់ បន្ថយមានៈដាក់ខ្លួន ហើយឧស្សាហ៍ព្យាយាមធ្វើដោយយកចិត្តទុកដាក់។ ចូរអ្នកចាំទុកថា បើមិនលំបាកក៏មិនហៅថា បទពិសោធន៍ គ្មានការលំបាក គ្មានបទពិសោធន៍ ធ្វើម្តេចនឹងស្ទាត់ ធ្វើម្តេចនឹងអាចឈានទៅរកភាពជោគជ័យបាន ដូច្នេះខណៈពេលលំបាក ចូរអ្នកគិតថា នេះជាសេចក្តីផ្តើមនៃភាពជោគជ័យ។
យើងប្រហែលជាបញ្ចប់ការសិក្សានៅសាលារៀននៅថ្ងៃណាមួយ តែយើងនៅតែបន្តការសិក្សានេះជារៀងរហូតទោះបីគ្មានគ្រូក៏ដោយ ឬ អាចនិយាយបានថា ការសិក្សាគ្មានដែនកំណត់។ តាមពិតទៅអ្នកនឹងសិក្សាបានកាន់តែច្រើននៅពេលអ្នកចេះព្យាយាមពុះពារជាមួយការលំបាក ព្រោះថា បញ្ហាទាំងនោះនឹងធ្វើឲ្យអ្នកកាន់តែរីកចម្រើនពីមួយថ្ងៃទៅមួយថ្ងៃ។ លោក Kornel អ្នកជំនាញចិត្តសាស្ត្រ និង ជាសាស្ត្រាចារ្យ បានបង្ហាញថាសិស្សដែលជោគជ័យ គឺពួកគាត់តែងគិតថាអ្វីៗគឺពិបាក តែស៊ូទ្រាំជម្នះការលំបាកទាំងនោះហើយ អាចនិងស្រូបយកចំណេះដឹងផ្សេងទៀតបាននៅពេលអ្នកចេះផ្ដល់ពេលវេលាដល់ខ្លួនឯង។
នៅពេលដែលអ្នកអានសៀវភៅអ្វីមួយអ្នកត្រូវតែព្យាយាមស្វែងរកគំនិតសំខាន់ហើយព្យាយាមផ្សារភ្ជាប់ពីចំណុចមួយទៅចំណុចមួយទៀត។ ហើយពេលខ្លះក៏អាចសំអាងទៅលើហេតុផលក៏ដូចជាបទពិសោធន៍ផ្ទាល់ខ្លួនក៏បាន។ ការធ្វើបែបនេះ គឺអាចឲ្យការរៀនសូត្ររបស់អ្នក កាន់តែមានប្រសិទ្ធភាពខ្ពស់ជាងមុន។
ទ្រឹស្តីអ្នកជោគជ័យជាច្រើន ដែលឆ្លងកាត់ប្រវត្តិសិក្សាក៏គេបានទទួលស្គាល់នៅគោលការណ៍បួនចំណុចខាងលើថាពិតជាមានគុណសម្បត្តិធំធេង តែត្រូវផ្តើមដោយឆន្ទៈពិតប្រាកដមួយចេញពីខ្លួនឯងផងដែរ៕
.........................×..........................
^^^^^^^^^^*^^^^^^^^^^^^
អត្ថបទប្រមូលរៀបរៀងដោយខ្ញុំ រ៉ាសា - ស័ង្ហ
រូបភាពពីប្រភពផ្សេងៗគ្នា
Comments