ត្រឹមការស្រលាញ់បែបធម្មតា ក៏ស្កប់ស្កល់ហើយ

 មួយឆ្នាំមាន៣៦៥ថ្ងៃ សម្រាប់ខ្ញុំថ្ងៃណាក៏ពិសេសដែរឲ្យតែជាថ្ងៃអាចទទួលបានក្តីស្រលាញ់ពិត។ អរគុណមនុស្សដែលស្រលាញ់ខ្ញុំពិត បើទោះជាមិនបានសម្តែងទឹកចិត្តពិសេសអ្វីក្នុងថ្ងៃនេះ ត្រឹមក្តីស្រលាញ់ដែលពិតប្រាកដរបស់អ្នក ក៏ខ្ញុំស្កប់ចិត្តដែរ។ មិនសម្តែងទឹកចិត្តនាថ្ងៃពិសេស មិនមែនមានន័យថាមិនស្រលាញ់ ពោលពាក្យស្រលាញ់រាល់ថ្ងៃ ក៏មិនមានន័យថាស្រលាញ់ពិតដែរ ទង្វើ អាចសម្តែងទឹកចិត្តបរិសុទ្ធ ក៏អាចសម្តែងទឹកចិត្តក្លែងក្លាយបានដែរ។ កុំឈ្លក់វង្វេងនឹងអំណោយ ឬមនុស្សដែលមានវត្តមានត្រឹមតែពេលដែលអ្នករីករាយ។ កុំលោភលន់នឹងការបាន ព្រោះវត្ថុទាំងនោះវានឹងក្លាយជាអនុស្សាវរីយ៍ជូរចត់ នៅពេលដែលអ្នកដឹងពីចិត្តពិតរបស់អ្នកឲ្យ។  ប្រសិនបើអ្នកប្រើចិត្តលោភក្នុងការរាប់អាន អ្នកនឹងបានតែការស្រលាញ់ក្លែងក្លាយប៉ុណ្ណោះ។ ប្រសិនបើអ្នកប្រើបេះដូងក្នុងការរាប់អាន អ្នកក៏នឹងទទួលបានតែបេះដូងដូចគ្នា។ ចង់អានទឹកចិត្តនរណាម្នាក់ ចូរប្រើបេះដូងឲ្យច្រើនជាងភ្នែក។ មនុស្សដែលស្រលាញ់អ្នកពិតប្រាកដ គាត់មិនបានស្រលាញ់អ្នកតែមួយថ្ងៃនោះទេ គាត់ប្រហែលមិនសូវចេះនិយាយថាស្រលាញ់អ្នកដូចគ្នា។ តែគាត់មិនដែលភ្លេចទេ ថាអ្នកចង់បានអី ចូលចិត្តអី ហើយគាត់ក៏មិនដែលខ្វល់ខ្វាយ រើសថ្ងៃក្នុងការជូនអំណោយទៅអ្នកដែរ អ្វីដែលពិសេសនោះគឺ គាត់មិនធ្លាប់ទុកអ្នកចោលពេលដឹងថាអ្នកមិនសប្បាយចិត្ត ឬជួបបញ្ហាឡើយ។ អរគុណសម្រាប់ការជូនរបស់អ្នកទាំងអស់គ្នា អរគុណសម្រាប់អំណោយពីមនុស្សដែលស្រលាញ់ខ្ញុំ អរគុណសម្រាប់ការរៀបចំគ្រប់បែបយ៉ាងក្នុងថ្ងៃនេះ។  #រីករាយចុងសប្តាហ៍ @imnarasa