កុំនៅតែបន្តភាពទន់ជ្រាយ

ដោះស្រាយបញ្ហាបានហើយ អ្នកនឹងទទួលបានក្តីសុខពេញលេញ ឆាប់ដោះស្រាយបញ្ហារបស់អ្នក ឈប់បន្តភាពទន់ជ្រាយទៀតទៅ។ ខ្យល់ត្រជាក់មិនបានធ្វើឲ្យអ្នករីករាយទេ បើអ្នកមិនបានឆ្លងកាត់រឿងមិនសប្បាយចិត្តពីម្សិលមិញ។ ខ្យល់ត្រជាក់នឹងធ្វើឲ្យអ្នកកាន់តែកំព្រាប្រសិនបើអ្នកមិនព្រមដើរទៅមុខ។ ជីវិតមិនដែលផ្ដល់ឱ្យយើងគ្រប់យ៉ាងនោះទេ! បាននេះ តែងតែខ្វះនោះ... បាននោះ បែរជាខ្វះនេះ... ប៉ុន្តែយើងខ្លួនឯងគឺជាអ្នករើសថា តើគួរស្វែងរកអ្វីដែលខ្វះមកបំពេញបន្ថែម ឬយល់ព្រមរស់នៅជាមួយអ្វីដែលយើងមានស្រាប់?  ដឹងទេ រយៈពេលរស់នៅ មានមិនច្រើនដូចរឿងហេតុក្នុងផែនដីនេះទេ។ ពេលវេលាតែមួយ មនុស្សច្រើនណាស់កំពុងទទួលអារម្មណ៍ ឬធ្វើរឿងផ្សេងៗគ្នា។ បើពេលនេះអ្នកមិនសប្បាយចិត្តទេ ត្រូវខំធ្វើរឿងនោះឲ្យហើយ ដើម្បីឆាប់បានទៅចាប់យករឿងហេតុថ្មីៗដែលនឹងកើតឡើងទៀត។ រឿងថ្មីអាចធ្វើឲ្យអ្នកកាន់តែពិបាកចិត្តខ្លាំង ឬអាចធ្វើអ្នកបាន សប្បាយចិត្តវិញ ឬអាចឲ្យអ្នកជួបនឹងអ្វីដែលរំភើបខ្លាំងទៀតផង។ ដូច្នេះហើយ រស់នៅត្រូវតែមានសង្ឃឹម ត្រូវតែរឹងមាំ កុំបារម្ភខ្លាំងពេក កុំបណ្តោយឲ្យចិត្តស្មុគខ្លាំងពេក។ ជីវិតណាក៏មិនអាចជៀសផុតពីបញ្ហាដែរ ប៉ុន្តែ នៅពេលដែលបញ្ហារលាយទៅ ភ្នែកមួយគូរបស់អ្នកនឹងមើលឃើញផែនដីស្រស់ស្អាតបំផុត។ ផែនដីនេះស្រស់ស្អាតណាស់ ខ្យល់អាកាសក៏ល្អដែរ គ្រប់ទីកន្លែងពោរពេញទៅដោយស្នាមញញឹម គ្រប់ទីកន្លែងគួរឲ្យចង់រស់នៅណាស់ ៕៚  @imnarasa