រៀបការក្នុងគុក (ពាក្យ៧)

https://s33.postimg.cc/60d1w7j3j/2018-07-16_22.37.16.png នៅក្នុងរបបវាលពិឃាត ជីវិតចង្អៀតសែនខ្លោចផ្សា គ្មានទាំងមនោសញ្ចេតនា រវាងគ្រួសារប្រពន្ធប្តី។ ស្រីខ្លះធ្វើការបាក់កំលាំង ក្រមុំខ្លះរាំងបាត់ខែថ្ងៃ ស្លេកស្លាំងទ្រុឌទ្រោមស្គមរីងរៃ ព្រោះបាយចំណីមិនគ្រប់គ្រាន់។ ស្រីក្មេងមើលទៅដូចជាចាស់ ប្រែប្រួលប្តូរផ្លាស់អស់សោភ័ណ ព្រោះតែពលកម្មសែនទារុណ ដកស្ទូងរែកពុនធ្ងន់ធ្ងរពេក។ ធ្វើការពីព្រឹករហូតយប់ ដល់ផ្ទះព្រលប់លូនចូលដេក រាងកាយខ្សោយខ្សោះអស់តម្រេក អស់កម្លាំងពេក ស្លេក​អារម្មណ៍។ លែងនឹកគិតឃើញអ្វីទាំងអស់ ក្រៅតែពីពោះកូររណ្តំ រឿងក្រពះឃ្លានហូបជាធំ អំបិលមួយដុំក៏ឆ្ងាញ់ដែរ។ គ្មានគិតស្នេហាការតពូជ ម្នាក់ៗក្បាលដូចសត្វតុកកែ ខ្វះប្រេងសាប៊ូដុសលាងថែ មុជតែទឹកស្រែ-ក្អែលជាប់ខ្មៅ។ អ្នកដែលចង់កសាងគ្រួសារ មិនបាច់មេបាចូលចែចូវ គ្មានលើកជំនូនជូនម៉ែឪ រឿងធំស្រេចនៅលើអង្គការ។ យុទ្ធជននិងនារីក្លាហាន អាចរៀបការបានគ្មានបញ្ហា ឯអ្នកដប់ប្រាំពីរមេសា មិនអាចរៀបការអ្នកចាស់ឡើយ។ ទាល់តែពេញសិទ្ធិទាំងអស់គ្នា សកម្មការងារមិនកន្តើយ ទាំងប្រវត្តិរូបត្រឹមត្រូវហើយ ទើបអង្គការឲរៀបចំបាន។ របៀបរៀបការនៅពេលនោះ មិនបាច់វាយឃ្នោះគោះឆ្នាំងចាន មិនបាច់ភ្លេងភ្លាត់-បទបូរាណ មិនបាច់សន្តានញាតិអបអរ។ មិនបាច់ជប់លៀងច្រៀងរាំវង់ មិនបាច់ព្រះសង្ឃជួយសូត្រធម៌ មិនបាច់តុបតែងស្លៀកពាក់ល្អ មិនបាច់ជូនពរ-បាចផ្កាស្លា។ រៀបតាមបដិវត្តន៌ហ្មត់ចត់ក្រៃ ប្រុសស្រីឈរនៅមុខអង្គការ លើកដៃឡើងលើហើយប្តេជ្ញា ស្មោះនិងអង្គការរហូតទៅ។ ពាក់មួករបបមាននាឡិកា បង់កក្រមារខោអាវខ្មៅ ស្បែកជើងកង់ឡានជាន់ខ្ទេចស្មៅ បើមានម៉ែឪ-ឲនៅក្រោយ។ ជួនកាល​ជប់លៀង​នំបញ្ចុក រៀបដាក់លើតុស្ទើរគ្មានល្បោយ មាននំបាញ់នឿកលេបក្អឿកក្រោយ អ្នកកំលាំងខ្សោយភ្នែកបញ្ឈរ។ គូរៀបការខ្លះឃើញគ្នាមុន ធ្លាប់យល់សោភ័ណអាក្រក់ល្អ ស្អាតឫមិនស្អាត-ខ្មៅឫស ទាក់ទងគិតគូរយូរមកហើយ។ គូខ្លះមិនដែលឃើញមុខគ្នា ស្រេចលើអង្គការកំណត់ឲ ម្នាក់ទៅខាងមុខ-ម្នាក់​នៅ​ក្រោយ ខ្លះឃើញគ្នាហើយស្រងាកចិត្ត។ សុទ្ធតែពួកឈ្លបដែលពិការ សល់ពីមរណាច្រើនពេកពិត ខ្លះកំបុតដៃខ្លះជើងស្វិត ខ្លះមុខក្រពិតខ្វាក់ភ្នែកម្ខាង។ យកមកឲឈរតំរៀបគ្នា ចងសំពត់ជាវាំងននបាំង ហុចតែម្រាមមួយចេញមកម្ខាង ឲពួកនាងៗចាប់ទាញដៃ។ ចាប់ប៉ះអ្នកណាយកអ្នកនោះ ទោះឆែបច្រមុះឫជើងខ្លី ទោះជាខ្វាងម្ខាក់បាក់អត់ដៃ ក៏មិនត្រូវស្តីជំទាស់ដែល។ ត្រូវតែរៀបការមិនរអ៊ូ រៀបម្តងម្ភៃគូឈរមុខក្រោយ តាំងចិត្តប្តេជ្ញាមិនកន្តើយ ពេលរៀបការហើយត្រូវតែស្មោះ។ ពូកឈ្លបចាំលបលួចយកការ យប់ឡើងកាលណាគូទាំងអស់ ព្រមរួមដំណេកឫអត់សោះ? បើព្រមបានរស់-អត់គឺស្លាប់។ រៀបការក្នុងគុកឥតជញ្ជាំង នឹកឡើងអួលភាំងឈឺចុកចាប់ វិប្បលាសផ្លាស់ប្តូរប្រែក្រឡាប់ រៀបការ-ដូចស្លាប់-មានន័យអ្វី? ៕ https://s33.postimg.cc/xnprag9gv/2018-07-16_22.36.43.png អ្នកនិពន្ធ: គង្គ ប៊ុនឈឿន