ចំនួនអាន: 7,174 ភាពជោគជ័យគឺជាអ្វីម៉្យាងដែលមនុស្សគ្រប់គ្នាចង់សម្រេចវា​ និងបានចំណាយពេលស្ទើរ​តែ មួយជីវិតក្នុងការសម្រេចវា។ មានមនុស្សមិនច្រើនទេដែលព្យាយាម ចាប់យកឪកាសដើម្បី សម្រេចភាពជោគជ័យបាន។ ស្ថាបនិកនិងជា CEO របស់ក្រុមហ៊ុន Alibaba លោក Jack Ma គឺជាបុរសម្នាក់ ក្នុងចំណោមអ្នកមានបំផុតនៅលើពិភពលោកដែលសម្រេចបាននូវអ្វី គ្រប់យ៉ាង ទោះបីជាមានការបដិសេធនិងការបរាជ័យក្នុងជីវិតច្រើនលើកច្រើនសា ក៏ដោយ។ ​បើសិនជាអ្នកចង់សម្រេចភាពជោគជ័យដូចជាលោក Jack Ma អ្នកត្រូវតែយល់ពីកន្លឹះដ៏មាន តម្លៃដែលនាំឱ្យលោកមានថ្ងៃនេះជាមុនសិន៖ ១. ចក្ខុវិស័យរបស់គាត់៖ បើតាមលោក Jack Ma មេដឹកនាំដ៏ល្អត្រូវមានការគិតទុកជាមុន និងត្រៀមទុកមុននូវអ្វីដែលអាចនឹងកើតមាន។ មនុស្សម្នាក់ៗគួរតែមាន លទ្ធភាព និងហ៊ានប្រឈមនឹងការប្រកួតប្រជែង និងពង្រឹងសមត្ថភាពក្នុងការគិតទុកជាមុនថា តើការសម្រេចចិត្តនៅថ្ងៃនេះអាចនឹងប៉ះពាល់ដល់អនាគតដែរឬទេ? អ្នកត្រូវមានជំនាញគិត​ច្នៃប្រឌិត និងរកអ្វីដែលថ្មីៗដើម្បីត្រៀមសម្រាប់បញ្ហានៅថ្ងៃខាង មុខផងដែរ។ ២. ឥរិយាបថ៖ លោក Jack Ma សង្កត់ធ្ងន់ទៅលើសារៈសំខាន់នៃអាក្បកិរិយា។ គាត់គិតពីឥរិយាបថនិង ចំណង់ចំណូលចិត្តលើជំនាញទ្រឹស្ដីដែលវាធ្វើឱ្យអ្នកអាចធ្វើដំណើរទៅរកភាពជោគជ័យ បានដោយងាយ។ ៣. ធ្វើការជាមួយមនុស្សដែលមានទេពកោសល្យ៖ Jack Ma គិតថាការជ្រើសរើស​បុគ្គលិកគឺជាចំណុចសំខាន់បំផុត ប្រសិនបើមនុស្សម្នាក់ត្រូវបានជួលហើយមិនមានជំនាញបច្ចេកទេសខ្ពស់ទេ វាមានន័យថាចក្ខុវិស័យរបស់អ្នកនឹងមិនអាចជោគជ័យបានឡើយ។ អ្នកមិនអាចធ្វើការដើម្បីទស្សនៈវិស័យរបស់អ្នកបានទេ​ ប្រសិនបើអ្នកមិនមានមនុស្សដែលយល់​ពីអ្នកបានត្រឹមត្រូវ។ ៤. ការបរាជ័យដ៏ធំបំផុ​ត​៖ បើតាមលោក Jack Ma ការបរាជ័យដ៏ធំបំផុតគឺជាការចុះចាញ់នៅក្នុងជីវិត។ មានជីវិត ត្រូវមានការព្យាយាមឱ្យអស់ពីសមត្ថភាព បើទោះនៅតែបរាជ័យក៏ដោយ ព្រោះថាវាអាចជាមេរៀនដ៏ល្អមួយសម្រាប់អ្នកផងដែរ។ ៥. ភាពរីករាយក្នុងជីវិត៖ លោក Jack Ma ចង់ឱ្យមនុស្សផ្លាស់ប្ដូរគំនិតរបស់ពួកគេទាក់ទងនឹងលុយ។ ហើយលុយគួរតែត្រូវបានធ្វើឡើងគឺដើម្បីធ្វើនូវរឿងដែលល្អៗសម្រាប់មនុស្សជាតិ។