ត្រៀមកនយើង! ខ្មែរគ្រោងពង្រីកព្រលានយន្តហោះ៣កន្លែងទៀត ដើម្បីទទួលចិន២លាននាក់ ២ឆ្នាំខាងមុខ!
រាជរដ្ឋាភិបាលកម្ពុជា គ្រោងនឹងពង្រីកអាកាសយានដ្ឋានអន្តរជាតិដូចជា៖ រាជធានីភ្នំពេញ ខេត្តព្រះសីហនុ។ ជាពិសេសនោះ បើភ្ញៀវទេសចរចិនមានកំណើនកាន់តែខ្លាំង រដ្ឋាភិបាល គ្រោងស្ថាបនាព្រលានយន្តហោះមួយកន្លែងទៀត នៅស្រុកកណ្ដាលស្ទឹង ខេត្តកណ្ដាល។ នេះបើតាមអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលលោក ស៊ិន ចាន់សិរីវត្ថា បានមានប្រសាសន៍ឲ្យដឹងកាលពីថ្ងៃទី២៣ តុលាកន្លងមក។
លោកបានបន្ថែមថា កម្ពុជាមានទិសដៅទទួលភ្ញៀវទេសចរចិនឱ្យបាន២លាននាក់ នៅក្នុងឆ្នាំ២០២០ខាងមុខ។ ប៉ុន្តែបើតាមស្ថានភាពជាក់ស្ដែង អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលថា ភ្ញៀវទេសចរចិន ដែលមកលេងកម្ពុជាពេលបច្ចុប្បន្ន គឺអាចកើនលើសពីចំនួននេះទៅទៀត។
ក្រសួងទេសចរណ៍ បានបង្ហាញការព្យាករថា នៅឆ្នាំ២០៣០ កម្ពុជា នឹងទទួលបានទេសចរអន្តរជាតិប្រមាណ ១៥លាននាក់ និងទេសចរជាតិប្រមាណ១៣លាននាក់។ ដើម្បីឆ្លើយតបនឹងកំណើនភ្ញៀវទេសចរនេះ កម្ពុជាត្រូវការសណ្ឋាគារប្រមាណជាង ១០ម៉ឺនបន្ទប់ (សណ្ឋាគារប្រណិត លំដាប់ផ្កាយ ៤ និងផ្កាយ៥ ប្រមាណ៦០% ស្មើប្រមាណ៦ម៉ឺនបន្ទប់) នៅទូទាំងប្រទេស។
ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានបន្ថែមថា នៅឆ្នាំ២០៣០ សម្រាប់ខេត្តព្រះសីហនុ គឺត្រូវការបន្ទប់សណ្ឋាគារជាង ៣ម៉ឺនបន្ទប់បន្ថែមទៀត (សណ្ឋាគារប្រណិតជាង២ម៉ឺនបន្ទប់) ដើម្បីឆ្លើយតបនឹងតម្រូវការកំណើនភ្ញៀវទេសចរអន្តរជាតិប្រមាណ ២លាននាក់ និងទេសចរជាតិប្រមាណ ៣លាននាក់។
បច្ចុប្បន្ននេះ កម្ពុជាមានសណ្ឋាគារប្រមាណជាង ៨០០កន្លែង ស្មើនឹង ៤៦ពាន់បន្ទប់ (ក្នុងនោះសណ្ឋាគារប្រណិតមានប្រមាណជាង ២ម៉ឺនបន្ទប់)។ ក្នុងនោះខេត្តព្រះសីហនុ មានសណ្ឋាគារ ៦៩កន្លែង ស្មើនឹងជាង ៤ពាន់បន្ទប់ (សណ្ឋាគារប្រណិតមានប្រមាណជាង ១ពាន់បន្ទប់)។ នេះបើតាមរបាយការណ៍របស់ក្រសួងទេសចរណ៍៕ (sabay)
0.000 SRY