ស្ងាត់ៗ Facebook នឹកឃើញ​វិធីកើបលុយ​មួយ​បែប​ទៀត​ពី​ Messenger

 កាលពីថ្ងៃអង្គារ៍ម្សិលមិញ ក្រុមហ៊ុន Facebook បានប្រកាសពីការដាក់ឲ្យវីដេអូផ្សាយពាណិជ្ជកម្មនៅលើកម្មវិធី Messenger ដំណើរការដោយស្វ័យប្រវត្តិ។ បើតាមក្រុមហ៊ុន មុខងារនេះធ្វើឡើងមក ដើម្បីឲ្យអ្នកប្រើប្រាស់កម្មវិធី Facebook Messenger មកចាប់អារម្មណ៍ នឹងពាណិជ្ជកម្មរបស់ខ្លួនជាងមុន។ ក្រុមហ៊ុន Facebook បានចាប់ដាក់ផ្ទាំងផ្សាយពាណិជ្ជកម្មលើកម្មវិធី Facebook Messenger តាំងតែ​ពី​ខែ​កក្កដាឆ្នាំមុនមកម៉្លេះ ដោយវាមានលក្ខណៈដូចជាផ្ទាំងផ្សាយពាណិជ្ជកម្មលើ Facebook និង Instagram ដូច្នោះដែរ។ ការដាក់ឲ្យវីដេអូដំណើរការដោយខ្លួនឯងនៅលើកម្មវិធី Facebook Messenger នេះ នឹងដំណើរការចំពោះគណនីអ្នកប្រើប្រាស់មួយចំនួនជាមុនសិន មុននឹងវាមានចេញជាផ្លូវការជុំវិញពិភពលោក។ បន្ថែមពីលើនេះ ក្រុមហ៊ុន Facebook បានសរសេរនៅក្នុងគេហទំព័ររបស់ខ្លួនថា “បើតាមក្រុមហ៊ុនស្ទង់មតិធំៗក្នុងលោកទាំង ៨ មានមនុស្សពេញវ័យជាង ៨០ភាគរយ ដែលប្រើប្រាស់កម្មវិធីផ្ងើសារប្រចាំថ្ងៃ ហើយក្នុងនោះកម្មវិធី Facebook Messenger និង Whatsapp គឺជាកម្មវិធី ដែលមានអ្នកប្រើប្រាស់សកម្មច្រើនជាងគេបំផុត។ ប៉ុន្តែមិនជាថ្វីឡើយ ក្រុមហ៊ុន Facebook បាន​បញ្ជាក់​សម្រាប់អ្នកមិនចង់ឃើញពាណិជ្ជកម្មទាំងនេះ អាច​បិទផ្ទាំងពាណិជ្ជកម្មណាមួយលើ Facebook ដែលខ្លួនមិនចង់ឃើញដោយជ្រើសយក “Why am I seeing this Ad” ដោយលោក Mark Zuckerberg បានឲ្យក្រុមហ៊ុនបញ្ចេញមុខងារនេះផ្ទាល់ ដើម្បីស្ដារមុខមាត់ក្រុមហ៊ុនឡើងវិញ ក្រោយពីជួបរឿងអាស្រូវបែកធ្លាយទិន្នន័យ អ្នកប្រើប្រាស់ជាង ៨៧ លានគណនី ដល់ដៃក្រុមហ៊ុន Cambridge Analytica រួចមក។ មុខងារនេះក៏នឹងត្រូវប្រើលើ Facebook Messenger​ ដែរ គ្រាន់តែវាមិនអាចកំណត់ឲ្យបិទម្ដងទាំងពីរបានព្រមគ្នាតែប៉ុណ្ណោះ។