រមណីដ្ឋាន ភ្នំឋានសួគ៌បូកគោ មានកន្លែងក្នុងប្រវត្តិសាស្រ្តគួរទស្សនា
ថ្វីត្បិតតែខ្ញុំមិនដែលបានទៅដល់ រមណីដ្ឋាន ភ្នំបូកគោ មែនពិត ប៉ុន្តែខ្ញុំក៍ធ្លាប់បានឃើញ នឹងធ្លាប់បានអាន អត្ថបទផ្សេងៗដែលនិយាយអំពី រមណីដ្ឋាន ភ្នំបូកគោនេះខ្លះៗដែរ។តាមរយៈបណ្ដាញសង្គមនានាដូចជា : សាពត៍មាន youtube facebook ជាដើម។ដែលបានបង្ហាញទាំងរូបភាពដ៍ស្រស់ស្អាត នឹងមានទាំងសំនេរ រៀបរាប់អំពីទីកន្លែងគួរអោយចាប់អារម្មណ៍មួយចំនួននៅរមណីដ្ឋាន ភ្នំបូកគោ។ថ្ងៃនេះខ្ញុំនឹងនាំអារម្មណ៍បងប្អូន អោយទៅស្គាល់កន្លែងក្នុងប្រវតិ្តសាស្រ្តនានានៅរមណីដ្ឋាន ភ្នំបូកគោ ដែលបានរៀបរាប់ដោយបងប្រុស ប៊ុនហេងដូចតទៅ :
១) បដិមាលោកយាយម៉ៅ : បដិមាលោកយាយម៉ៅ មានកម្ពស់ 29 ម៉ែត្រ ត្រូវបានសាងសង់ឡើងនៅឆ្នាំ 2010 ស្ថិតក្នុងឥរិយាបថអង្គុយសមាធិបែរព្រះភក្រ្តសម្លឹងទៅកាន់ផ្ទៃសមុទ្រ។ បដិមាលោកយាយម៉ៅដ៏ធំសម្បើមដែលមានអាសនៈលើភ្នំបូកគោនេះ គឺជាទីកន្លែងបូជាថ្មីមួយរបស់ប្រជាជនខ្មែរដែលគោរពជឿជាក់លើព្រលឹងដែលថែរក្សាអ្នកដំណើរទាំងឡាយអោយមានសេចក្តីសុខនិងសុវត្ថិភាព។
២) ទឹកជ្រោះពពកវិល : ទឹកជ្រោះពពកវិលត្រូវបានគេដាក់ឈ្មោះអោយសមទៅនឹងការពិតនៃទីកន្លែងមួយនេះ ដែលមានផ្ទាំងពពកនៅអណ្ដែតត្រសែតពីខាងលើជាប់មិនលោះពេល។ នៅក្នុងរដូវវស្សា ទឹកជ្រោះពពកវិលមានសម្រស់ស្រស់ស្អាតនិងអាចអោយភ្ញៀវទេសចរហែលលេងបាន ។ នៅទីនេះ អ្នកអាចអង្គុយសម្រាកលំហែ ដើរគយគន់ព្រៃព្រឹក្សា និងទទួលទានអាហារថ្ងៃត្រង់ ដោយជ្រើសយកបរិវេណក្បែរទឹកជ្រោះ ឬនៅខាងក្នុងភោជនីយដ្ឋានទឹកជ្រោះពពកវិល។
៣) ថ្មមុខយក្សឬអ្នកថែរក្សាព្រៃ : នៅពេលធ្វើដំណើរឡើងភ្នំបូកគោ សូមកុំភ្លេចឈប់សម្រាកនៅគីឡូម៉ែត្រលេខ 10 ដើម្បីផ្តិតយករូបភាពដ៏ចម្លែកអស្ចារ្យរបស់ផ្ទាំងថ្ម ដែលមានសណ្ឋានជាមុខមនុស្ស ហើយត្រូវបានគេដាក់ឈ្មោះអោយថា«ថ្មមុខយក្ស» ឬហៅម្យ៉ាងទៀតថា«អ្នកថែរក្សាព្រៃ»។ កាលពីមុន ថ្មមុខយក្សនេះគឺជាទីកន្លែងដែលអ្នកដើរព្រៃនិងអ្នកធ្វើដំណើរនានាគោរពបន់ស្រន់សុំសេចក្តីសុខ។
៤) បឹងលើភ្នំ : នៅចម្ងាយប្រមាណ 5 គម ពីរមណីយដ្ឋានឋានសួគ៌បូកគោ មានទីកន្លែងសម្រាប់ការកម្សាន្តកីឡាលើទឹកមួយចំនួនរង់ចាំភ្ញៀវទៅកម្សាន្ត មានដូចជា ការជិះទា ទូកកានូ ទូកកាយ៉ាក់ និងស្ទូចត្រីជាដើម។ បឹងលើភ្នំនេះផ្ទុកទឹកចំនួនកន្លះលានម៉ែត្រគូប។
៥) វត្តសំពៅប្រាំ : “វត្តសំពៅប្រាំ”ត្រូវបានដាក់ឈ្មោះទៅតាមថ្មដែលដុះឡើងមកមានរាងដូចជាសំពៅប្រាំតម្រៀបគ្នា ហើយក៏មានរឿងនិទានទាក់ទងនឹងថ្មសំពៅប្រាំនេះ។ វត្តសំពៅប្រាំមានទីតាំងនៅលើជ្រោយមួយដែលអាចមើលឃើញទេសភាពនៃព្រៃព្រឹក្សាពណ៌ខៀវស្រងាត់នៅតាមជ្រលងដងភ្នំ និងផ្ទៃសមុទ្រធំល្វឹងល្វើយឆ្ងាយសន្លឹមនៅខាងក្រោម អមដោយផ្ទាំងពពកដេរដាសគួរជាទីគយគន់ពេកក្រៃ។
៦) ព្រះវិហារកាតូលិកចាស់ : ព្រះវិហារកាតូលិកចាស់ ត្រូវបានសាងសង់ឡើងដោយជនជាតិបារាំងនៅដើមឆ្នាំ 1920 ដែលជាផ្នែកមួយនៃការសាងសង់បុរីលម្ហែលើភ្នំបូកគោ។ ព្រះវិហារនេះនៅរក្សាបានទ្រង់ទ្រាយដើម និងមានសភាពរឹងមាំ។ នៅខាងក្រោយព្រះវិហារ មានទួលមួយដែលជាកន្លែងគយគន់ថ្ងៃលិចដ៏លន្លង់លន្លោច និងស្រស់ស្អាតជាងគេនៅលើភ្នំបូកគោ។
៧) ឡឺ បូកគោ ផាលេស (សណ្ឋាគារចាស់) : សំណង់អគារប្រវតិ្តសាស្រ្តមួយនេះ ធ្លាប់ជាសណ្ឋាគារដ៏ធំស្កឹមស្កៃនិងស្រស់ស្អាតមួយនាសម័យអាណានិគមនិងរាស្រ្តនិយម។ ក្រោយពីត្រូវបោះបង់ចោល សណ្ឋាគារនេះបានប្រែសម្បុរទៅតាមកាលវេលា ប៉ុន្តែអគារទាំងមូលនៅមានសភាពរឹងមាំនៅឡើយ ហើយបច្ចុប្បន្នកំពុងត្រូវបានជួលជុលលាបពណ៌ឡើងវិញ ដោយរក្សានូវទម្រង់ដើមទាំងស្រុង។
៨) ដំណាក់ស្លាខ្មៅ : ដំណាក់ស្លាខ្មៅ គឺជាអតីតព្រះរាជដំណាក់របស់ព្រះបាទនរោត្តម សីហនុ សម្រាកលម្ហែព្រះកាយ ដែលត្រូវបានសាងសង់ឡើងពីថ្មនិងមានបិទដោយឈើស្លា���្មៅនៅក្នុងឆ្នាំ1936។ ថ្វីបើអគារទាំងមូលនៅមានសភាពរឹងមាំយ៉ាងណាក្តី ប៉ុន្តែទ្វារនិងបង្អួចនៃដំណាក់នេះត្រូវបានបាត់បង់អស់ទៅហើយ។ នៅទីនេះ អ្នកនឹងបានឃើញពីទេសភាពដ៏ស្រស់ស្អាតគួរអោយរំភើបនៅខាងក្រោយដំណាក់ ហើយទីនេះក៏ជាទីកន្លែងសម្រាប់គយគន់ទេសភាពថ្ងៃរៀបលិចដ៏អស្ចារ្យផងដែរ។
៩) ដំណាក់ព្រះបាទមុនីវង្ស ឬដំណាក់ស្តេច : ដំណាក់ព្រះបាទមុនីវង្ស គឺជាអគារមួយក្នុងចំណោមសំណង់អគារជំនាន់អាណានិគមដ៏ធំស្កឹមស្កៃគួរអោយកត់សម្គាល់នៅលើភ្នំបូកគោ។ ដំណាក់នេះត្រូវបានសង់សម្រាប់ព្រះបាទមុនីវង្ស ដើម្បីទ្រង់សម្រាកកម្សាន្តពីអាកាសធាតុក្តៅ។
១០) វាលស្រែ100 : ជាដំបូង អ្នកប្រហែលជាចាប់អារម្មណ៍នឹងឈ្មោះដ៏ពិរោះរបស់ទីកន្លែងមួយនេះ បន្ទាប់មកអ្នកក៏អាចនឹងភ្ញាក់ផ្អើលចំពោះទេសភាពនោះទីនេះផងដែរ។ វាមិនមែនជាវាលស្រែទេ តែវាគឺជាផ្ទាំងថ្មដែលដុះរដិបរដុបខណ្ឌចែកវាលស្មៅដ៏ធំល្វឹងល្វើយ។ វាលស្រែ១០០ ជាទីកន្លែងមួយដ៏ស្រស់ស្អាតសម្រាប់ការផិ្តតយករូបភាពអនុស្សាវរីយ៍នៅក្នុងម៉ាស៊ីនថតរបស់អ្នក។
១១) វាលស្រែ500 : វាលស្រែ 500 មានចម្ងាយ ១៧គីឡូម៉ែត្រ ពីរមណីយដ្ឋាន ឋានសួគ៌បូកគោ ដែលចំណាយពេលធ្វើដំណើរប្រហែលជា ៣០ នាទីតាមរថយន្ត។ វាលស្រែ500 គឺជាឈ្មោះនៃតំបន់ព្រៃភ្នំធម្មជាតិមួយកន្លែង ដែលលាក់ខ្លួនពួនអាត្មាជាយូរមកហើយនៅលើភ្នំបូកគោ ដែលរមណីយដ្ឋានទើបនឹងបាន ត្រួសត្រាយផ្លូវថ្មី អោយភ្ញៀវបានចូលទស្សនា។ នៅទីនេះ ក៏ជាជម្រករបស់ផ្កាបំពង់ក្រឡោម ផ្កាអ័រគីដេព្រៃ និងសត្វមេអំបៅជាច្រើនប្រភេទផងដែរ។
១២) កន្លែងសមាធិ : មិនថាទីតាំង សម្រស់ធម្មជាតិ ឬបរិយាកាស ឧទ្យានជាតិភ្នំបូកគោ មានលក្ខណៈពិសេសដាច់ដោយឡែកដែលកម្ររកគូប្រដូចបានសម្រាប់ការកម្សាន្តទាំងផ្នែកផ្លូវកាយនិងផ្លូវចិត្ត។ នៅមិនឆ្ងាយពីរមណីយដ្ឋាន ឋានសួគ៌បូកគោ មានទីតាំងសមាធិដ៏ស្ងប់សុខនិងស័ក្ដិសិទ្ធិជាច្រើនដែលកំពុងរង់ចាំលោកអ្នក មកសម្រាកបន្ធូរអារម្មណ៍ ស្វែងរកពេលវេលាស្ងប់សុខសម្រាប់ផ្លូវចិត្ត កែសម្រួលអារម្មណ៍អោយស្រស់ថ្លា និងរក្សារាងកាយនិងទឹកចិត្តអោយមានថាមពលរឹងមាំបានផងដែរ។
https://youtu.be/3QNZAM6iuaw
0.000 SRY