តម្លៃផ្ទាល់ខ្លួន
ជីវិតរបស់យើងអាចផ្លាស់ប្ដូរពីល្អទៅអាក្រក់ ពីអាក្រក់ទៅល្អ ចៀសមិនផុត។ វាជារឿងធម្មតា យើងអាចបាត់បង់ការងារ បាត់បង់ផ្ទះ រឺអ្នករាប់អាន ប៉ុន្តែមិនត្រូវបាត់បង់តម្លៃសម្រាប់ខ្លួនឯងឡើយ។ មានរឿងជាច្រើនដែលយើងគ្រប់គ្នាគួរយល់ដឹងអោយហើយ ទាន់ខ្លួននៅក្មេង។ដូចជា :
លុយមិនអាចដោះស្រាយបញ្ហាបានគ្រប់យ៉ាងនោះទេ :
លុយគឺជាឧបករណ៍ដោះដូរមួយដែលអាចអោយយើងទិញអ្វីដែលយើងត្រូវការបានគ្រប់ពេល ប៉ុន្តែមិនមែនបានន័យថា វាអាចដោះស្រាយបានគ្រប់យ៉ាងនោះទេ។ យើងមិនអាចប្រើលុយទិញទំនាក់ទំនងដែលប្រេះស្រាំទៅហើយបាននោះទេ។ លុយក៏មិនបានទៅជួយព្យាបាលរបួសក្នុងចិត្តយើងបានដែរ មិនអាចទិញពេលវេលា សុភមង្គល និងការស្រលាញ់ពិតប្រាកដបាននោះឡើយ។ ដូច្នេះកុំពឹងផ្អែកតែលើវាមួយមុខពេក ហើយកុំអោយលុយនោះក្លាយជាអាវុធដើម្បីសម្លាប់យើងមិនអោយមើលអ្វីផ្សេងបានអោយសោះ។
ចំណេះដឹងគ្មានដែនកំណត់ឡើយ : មនុស្សភាគច្រើនគិតថា ការកាន់សញ្ញាប័ត្រមួយសន្លឹកដែលបញ្ជាក់ពីការរៀននៅសាលាដ៏ល្បីនៅលើពិភពលោកគឺជាអ្វីដែលអ្នកណាក៏ចង់បាន អ្នកណាក៏សរសើរ ហើយវាជាចុងបញ្ចប់នៃពាក្យថា ( រៀន )។ ប៉ុន្តែការពិត ចំណេះដឹងមិនមានដែនកំណត់ច្បាស់លាស់ឡើយ។ ការរៀននៅសាលាអាចបញ្ចប់បាន តែការរៀនក្នុងជីវិតពិតនឹងនៅបន្តរហូត ដរាបណាយើងនៅមានជីវិត។
រូបយើងនៅក្នុងភ្នែកអ្នកដទៃបែបណា មិនចាំបាច់ត្រូវខ្វល់នោះទេ : យើងអាចរស់បាន អាចគិតគូរពីដំណើរជីវិតយើងបាន ដូច្នេះមិនបាច់ដេកព្រួយថា អ្នកណាមកគិតបែបណាចំពោះយើង រឺអោយគេមកកំណត់គោលដៅជីវិតអោយយើងនោះឡើយ។
សុខភាពជាទ្រព្យសម្បត្តិដែលមិនអាចកាត់ថ្លៃបាន : ការមានលុយ គឺជាក្ដីសុខមួយផ្នែកដែលយើងចង់បាន។ ប៉ុន្តែសុខភាពទៅវិញទេ ដែលយើងត្រូវការពិតប្រាកដ។ កាលណាមានសុខភាព យើងអាចមានកម្លាំងធ្វើអ្វីគ្រប់យ៉ាង រួមទាំងការរកលុយផងដែរ។
យើងមិនអាចផ្គាប់ចិត្តមនុស្សគ្រប់គ្នាបានឡើយ : ជីវិតយើងម្នាក់ៗមិនចាំបាច់ទាល់តែអោយគេមកចូលចិត្តរឺស្រលាញ់យើងគ្រប់ៗគ្នានោះទេ។ មនុស្សមានការគិតរៀងៗខ្លួន ដូច្នេះគ្រាន់តែច្បាស់ខ្លួនឯងថា យើងចង់ធ្វើអ្វី ចង់ដើរផ្លូវណា ហើយវាមិនប៉ះពាល់ផលប្រយោជន៍អ្នកដទៃទៅបានហើយ។ ចង់អ្នកណាចូលចិត្ត រឺមិនចូលចិត្តក៏ជារឿងរបស់គេទៅ។
អ្នកផ្សេងមិនអាចមានអ្វីដែលយើងមានឡើយ : អ្នកណាក៏មានចំណុចពិសេសរៀងៗខ្លួន គេមានរបស់ដែលយើងគ្មាន ឯយើងក៏មានរបស់ដែលគេមិនអាចមានដូចគ្នា។ ដូច្នេះកុំចាំបាច់យកខ្លួនទៅប្រៀបធៀប ហើយកើតទុក្ខនឹងរឿងគេធ្វើអី សំខាន់ធ្វើអោយខ្លួនយើងពេញចិត្តអ្វីដែលកំពុងមានពេលនេះសិនទៅបានហើយ។
0.000 SRY