គ្រប់ទំនាក់ទំនងសាងឡើងព្រោះតែប្រយោជន៍! ហ៊ានទទួលយកការពិត ដើម្បីអាចឈរលើសុភវិនិច្ឆ័យយ៉ាងត្រឹមត្រូវបាន! កុំខឹងគេ បើដឹងថាគេរាប់អានអ្នកព្រោះតែប្រយោជន៍ បើខឹង ត្រូវសួរខ្លួនឯងវិញ តើអ្នកមិនចង់បានប្រយោជន៍ពីគេទេឬ? កុំកុហកឲ្យសោះ! ប្រយោជន៍មានច្រើនបែបច្រើនយ៉ាងណាស់ គ្រាន់តែមិនដឹងថារូបភាពបែបណាយ៉ាងណាដែលម្នាក់ៗចង់បានពីគ្នា។ ស្គាល់គ្នាស្និទ្ធស្នាលគ្នា ក៏ព្រោះដោយសារតែ ១. ស្រួលទំនាក់ទំនងការងារជាមួយគ្នា ២. ថ្ងៃមុខអាចក្លាយជាដៃគូសហការមុខជំនួញផង ៣. ម្នាក់នោះមានកិត្តិនាមល្អនៅក្នុងសង្គមបច្ចុប្បន្ន ៤. គាត់មានចំណេះដឹង ងាយស្រួលប្រឹក្សា ៥. គាត់ចិត្តល្អ ៦. ចង់បានគាត់ធ្វើជាមិត្តល្អ ៧. មានច្រើនទៀត ទាល់តែរកនឹក..។ល។ គ្រាន់តែថា ពេលនេះឆ្លើយបានឬនៅថាប្រយោជន៍មួយណាដែលអ្នកចង់បានពីមនុស្សដែលអ្នកកំពុងមានទំនាក់ទំនងជាមួយ? អ្នកអាចកំពុងគិតដល់មនុស្សម្នាក់ ហើយឆ្លើយយកចំនុចទី៦ តែម្នាក់នោះបែរជាឆ្លើយយកចំនុចទី១ នៅពេលដែលគិតដល់អ្នកវិញក៏អាចថាបាន។ ដូច្នេះទំនាក់ទំនងរបស់អ្នកទាំងពីរមិនមែននៅលើផ្លូវនៃចំនុចទី១ ឬទី៦នោះទេ វាត្រូវតែ ៦បូក១ បើអ្នកទាំងពីរធ្វើឲ្យបាត់ចំនុចណាមួយ ទំនាក់ទំនងនឹងប្រែមកជាចំនុចសូន្យវិញមិនខានឡើយ។ ចំនុចសូន្យក៏ចាត់ទុកថារួចខ្លួន តែបើចំនុចដកសូន្យគឺអាក្រក់ណាស់ នៅពេលដែលក្លាយពីមិត្តទៅជាមនុស្សដែលត្រលប់ជាសត្រូវហើយត្រូវស្អប់គ្នា។ តែយ៉ាងណា ពេលមនុស្សពីរនាក់ចាប់ផ្តើមសាងទំនាក់ទំនងណាមួយជាមួយគ្នា ពួកគេមិនប៉ងឲ្យទំនាក់ទំនងនោះត្រូវបញ្ចប់ឬ ត្រូវស្អប់គ្នានៅពេលក្រោយនោះទេ។ ដូច្នេះដើម្បីឲ្យទំនាក់ទំនងមួយ រលូនទៅមុខបានយូរ គប្បីឧស្សាហ៍ថ្លឹងចិត្តគេ និងចិត្តខ្លួនឯងឲ្យបានស្មើគ្នានិងចេះ ផ្តល់ឲ្យគេតាមដែលគេអាចឲ្យបាន ឬទទួលពីគេតាមដែលខ្លួនអាចឲ្យគេវិញបាន។ ភាពលោភលន់ និងអាត្មានិយម,ចង់ចំណេញនាំឲដាច់ចំណង មិនថាមិត្តភាពឬដៃគូជីវិតឡើយ«ផ្តល់ទៅផលមក»៕៚