ក្រសួងធនធានទឹក និងឧតុនិយម នៅថ្ងៃទី១៦ ខែកក្កដា បាន​ចេញ​សេចក្តី​ប្រកាស​ អោយពលរដ្ឋ​នៅ​តាម​ដង​ទន្លេរ​មេគង្គ​លើ​និង​តំបន់​ទំនាប​នានាទាំង​អស់​ប្រញាប់ ប្រមូលកសិផលតាម​ដង​ទន្លេ ដោយ​សារ​តែរយៈពេល ២ ទៅ ៣ថ្ងៃទៀត ទឹកទន្លេមេគង្គលើនឹងហក់ឡើង។ ដោយសារតែឥទ្ធិពលរបស់ប្រព័ន្ធសម្ពាធទាបដែលកើតឡើង និងកំពុងស្ថិតលើតំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសថៃ និងប្រទេសឡាវ នាំ​អោយមានភ្លៀងធ្លាក់ជាបន្តបន្ទាប់ និងបង្កអោយទឹកទន្លេមេគង្គហក់ឡើង។ ស្រប​ពេល​ជាមួយ​គ្នា​នេះ​ដែរ ក្រសួង​ក៏​ប្រកាស​អោយ​​ពលរដ្ឋដែលរស់នៅក្នុងខេត្តស្ទឹងត្រែង ខេត្តក្រចេះ ខេត្តត្បូងឃ្មុំ និងខេត្តកំពង់ចាម ដែលកំពុងប្រកបរបរកសិកម្មអមសងខាងផ្លូវទឹក និងតំបន់នានា មេត្តារួសរាន់ប្រមូលកសិផលអោយបានទាន់ពេលវេលា។