បុរសអ្នកមានម្នាក់មានបំណងទៅលេងសើចជាមួយស្រីកំសាន្ត តែត្រូវនាងរៀបរាប់ប្រាប់ពីទុក្ខលំបាកក្នុងជីវិតនិងគ្រួសារ បុរសនោះប្រែជាលែងមានអារម្មណ៍រួមភេទហើយបានផ្តល់ប្រាក់ឲ្យនាងដូរមុខរបរបែបនេះចេញ ។ ថាមពលចិត្តមេត្តាឈ្នះថាមពលលោភលន់ មេទ័ពម្នាក់ស្រឡាញ់កូនចៅ មិនដែលហ៊ានលេបចំណីអាហារឆ្ងាញ់ក្បត់កូនចៅឡើយ តែងរួមសុខរួមទុក្ខជាមួយគ្នាមិនដែលមានចិត្តច្រណែនកូនចៅម្តងណាទេ ។ ថាមពលចិត្តមេត្តាឈ្នះថាមពលចិត្តកំណាច ព្រះពុទ្ធផ្ចាញ់អង្គុលីមា ខ្មាន់ធ្នូចុះចាញ់ឋាមពលចិត្តមេត្តាព្រះអង្គ ព្រះពុទ្ធផ្ចាញ់ដំរីនាឡាគិរី ។ល។ បច្ចុប្បន្ននេះថាមពលចិត្តមេត្តានៅមានកម្លាំងខ្លាំងនៅឡើយទេ ព្រោះមនុស្សចិត្តធម៌នៅមានច្រើន មិនទាន់ដាច់ពូជអស់នៅឡើយ ប៉ុន្តែបើម្នាក់ៗមិនបន្តអប់រំចិត្តទេ អំណឹះទៅថ្ងៃមុខកាលបើមនុស្សចិត្តធម៌លែងមាននៅលើលោកនេះហើយ ធម្មជាតិនៃចិត្តឃោរឃៅនឹងកើនឡើង ពេលនោះពិភពលោកនឹងត្រូវកាប់សម្លាប់គ្នា ទីបំផុតលោកនេះបានផុតរលត់វិនាសអន្តរធានទៅមួយរំពេចជាមិនខាន ។ ព្រះពុទ្ធទ្រង់ជ្រាបការនេះច្បាស់លាស់ណាស់ ទើបព្រះអង្គបង្រៀនព្រះកម្មដ្ឋានមេត្តាភាវនាដល់សត្វលោក ដើម្បីពន្យាពេលវិនាសទៅនៃភពផែនដីនេះ ។ "ថាមពលចិត្តមេត្តាឈ្នះថាមពលតណ្ហា និងឈ្នះថាមពលអ្វីៗទាំងអស់ !" ៕